गाउँलेको बिरोधले सिमकोट धारापोरी सडकको पहिरो पन्छाउन कठिन

सिमकोट । स्थानीयले बिरोध गरेपछि सिमकोट गाउँपालिका– ७ को धारापोरी गाउँका ठाडो ढुंगामा गएको सुख्खा पहिरो पन्छाउने कार्यमा अवरोध  भएको छ। 

सिमकोट ७ धारापोरीको चौगानफया गाउँका स्थानीयको विरोधको कारण सडकमा खसेको सुख्खा पहिरो पन्छाउन समस्या भएको हो।

पहिरो गएको स्थान ठाडो ढुंगाभन्दा माथि चौगानफा गाउँ रहेको र सो गाउँका स्थानीयले सडकमा खसेको सुक्खा पहिरो पन्छाउने कार्यमा अवरोध गरेको निर्माण कम्पनी दाप्चा आरएनका प्रतिनिधि सरोज रावतले बताए।

स्थानीय पहिरो पन्छाउदा गाउँलाई जोखिम हुने भन्दै त्यसको विरोध गरेका हुन। यसअघि निर्माण कम्पनीले दुई पटक सडकमा खसेको पहिरो पन्छाउने कार्य सुरु भए पनि माथिबाट पून पहिरो खस्ने क्रम जारी रहँदा रोकिएको थियो। अहिले पहिरो खस्न रोकिएपछि मर्मत गर्ने कार्य सुरु गर्ने तयारी गरेको बेला स्थानीयले विरोध जनाएपछि काम रोकिएको उनले बताए। सडक निर्माण गर्न अवरोध सृजना भएपछि स्थानीय सरकारले समेत पहल नगरेको उनले बताए।

उक्त सडकको निर्माण सम्पन्न गर्ने म्याद पुस मसान्तसम्म रहेको छ। स्थानीयले काम गर्न नदिएपछि समयमा काम सम्पन्न गर्न कठिन देखिएको छ।

यस सम्वन्धमा जिल्ला प्रशासनमा समेत कुरा पुगेको बताउँदै प्रमुख जिल्ला अधिकारी नारायण पाण्डेले राष्ट्रिय राजमार्गको काम यसरी रोक्न नपाइने बताए।

रोकिएको काम अगाडि बढाउन पहल गर्नेसमेत उनने बताए। यसका लागि वडा र गाउँपालिकाले समेत पहल गर्नुपर्नेमा उनले जोड दिए।