हिमाली जडिबुटी संरक्षण तथा दिगो व्यापार परियोजनाअन्तर्गत ४ दिने उद्यमशिलता तालिम हुम्लामा सुरु

सिमकोट, हुम्ला –  युके इन्टरनेशनल Darwin Initiative को आर्थिक सहयोगमा तथा TRAFFIC, एन्साब नेपाल र सामुदायिक वन उपभोक्ता महासंघ (FECOFUN) हुम्लाको सहकार्यमा सञ्चालित “हिमाली जडिबुटीहरुको संरक्षण र दिगो व्यापार” परियोजना अन्तर्गत ४ दिने उद्यमशिलता तथा व्यवसायिक योजना तयारी तालिम मंसिर ७ गतेदेखि १० गतेसम्म हुम्लाको सिमकोटमा सुरु भएको छ।

चार दिनसम्म सञ्चालन हुने यस तालिमको मुख्य उद्देश्य सहभागीहरूलाई उद्यमशिलता र उद्यम व्यवस्थापनका मूल पक्षहरूबारे स्पष्ट पार्ने, उपयुक्त उद्यम छनोटका विधि र प्रक्रियामा मार्गदर्शन गर्ने, बजार व्यवस्थापनबारे आवश्यक ज्ञान दिने तथा व्यवहारिक व्यावसायिक योजना (Business Plan) निर्माणमा सहभागीलाई दक्ष बनाउनु रहेको आयोजक संस्थाहरूले जनाएका छन्।

साथै वन पैदावरमा आधारित उद्यम सञ्चालनका लागि आवश्यक दिगोपनाका मापदण्ड, प्रमाणिकरण प्रक्रिया, तथा ती मापदण्ड पूरा गर्न आवश्यक तथ्यांक संकलन र व्यवस्थापन विधि बारे पनि विस्तृत रूपमा छलफल गरिने छ। उद्घाटन सत्रको अध्यक्षता FECOFUN हुम्लाका अध्यक्ष श्री राजेन्द्र कार्कीले गर्नुभएको थियो। कार्यक्रममा डिभिजन वन कार्यालय हुम्लाका डिभिजनल वन अधिकृत श्री महेश कुमाई प्रमुख अतिथि रहनुभएको थियो।

कार्यक्रममा जडिबुटी महासंघका अध्यक्ष श्री छिरिङ्ग लामा, उद्योग वाणिज्य संघ हुम्लाका अध्यक्ष श्री रामबहादुर भण्डारी, सव–डिभिजन वन कार्यालय सर्केगाडका वन अधिकृत वावुलाल भोम्जन तथा अन्य अतिथिहरूको विशेष उपस्थिति थियो।

तालिमका प्रमुख प्रशिक्षकका रूपमा एन्साब नेपालका उद्यम विकास विज्ञ शुशील ज्ञवाली, वन विज्ञान अध्ययन संस्थानका श्री विकास अधिकारी, FECOFUN हुम्लाका पदाधिकारी तथा जिल्लाका व्यापारी–व्यवसायीहरूको सक्रिय सहभागिता रहेको छ।

कार्यक्रमको सञ्चालन एन्साब नेपालका वन अधिकृत संगम हमालले गर्नुभएको थियो भने FECOFUN हुम्लाका सचिव श्री मञ्जु रावलले स्वागत मन्त्वय गर्नुभएको थियो । चार दिनसम्म सञ्चालन हुने यो तालिमले हिमाली जडिबुटीमा आधारित स्थानीय उद्यमहरूको दिगोपनामा महत्वपूर्ण योगदान पुर्‍याउने अपेक्षा गरिएको छ।