लिप्ने खोलामा पुल निर्माण गर्ने सांसद हर्क साम्पाङको प्रतिबद्धता

सिमकोट ।  सर्केगाड गाउँपालिका वडा नम्बर २ को लिप्ने खोलामा पुल निर्माणका लागि सांसद हर्क साम्पाङले प्रतिबद्धता जनाउनुभएको छ । स्थानीयवासी, जनप्रतिनिधि तथा गाउँका अगुवाहरूले आवतजावतमा सहजता ल्याउन पुल निर्माणको माग गरेपछि साम्पाङले स्थलगत अवलोकन गर्दै पुल बनाउने प्रतिबद्धता जनाउनुभएको हो । लालीगुराँस माध्यमिक विद्यालयका प्रधानाध्यापक कालीबहादुर महताराका अनुसार सांसद साम्पाङले हिजो लिप्ने खोलाको स्थलगत भ्रमण गर्नुभएको थियो ।

सोही क्रममा पुल निर्माणका लागि आवश्यक इस्टिमेट तयार पारेर टोली फर्किएको उहाँले जानकारी दिनुभयो । स्थानीयवासीका अनुसार वर्खायाममा लिप्ने खोला बढेपछि आवतजावतमा समस्या हुने गरेको छ । विशेषगरी खोलामा पुल नहुँदा विद्यार्थीलाई विद्यालय आउजाउ गर्न कठिनाइ हुने गरेको छ । खोलामा पुल निर्माण भएमा विद्यार्थी तथा स्थानीय बासिन्दालाई आवतजावत गर्न सहज हुने अपेक्षा गरिएको छ । यसअघि खडिखेतमा कादुरी संस्थाले तिहारपछि नै झोलुङ्गे पुल निर्माण गर्ने तयारी गरेको जनाइएको छ । खडिखेतमा पुल निर्माणको प्रक्रिया अघि बढेसँगै लिप्ने खोलामा पनि पुल बनाउनुपर्ने माग स्थानीयले सांसद साम्पाङ समक्ष राखेका थिए ।

गाउँका अगुवा तथा जनप्रतिनिधिहरूले लिप्ने खोलामा पुल नहुँदा स्थानीयले भोग्दै आएको समस्याबारे जानकारी गराउँदै पुल निर्माणका लागि विशेष आग्रह गरेका थिए। स्थानीयको मागलाई सम्बोधन गर्दै सांसद साम्पाङले पुल निर्माण गर्ने प्रतिबद्धता जनाउनुभएको प्रधानाध्यापक महताराले बताउनुभयो ।

 लिप्ने खोलामा पुल निर्माण भएमा वर्षायाममा विद्यार्थीलाई विद्यालय पुग्न सहज हुनुका साथै स्थानीय बासिन्दाको दैनिक आवतजावतमा समेत राहत पुग्ने विश्वास गरिएको छ । मंसिर, पुष महिनाबाट पुल बनाउने भएको वडा अध्यक्ष सिद्ध कार्कीले जानकारी दिनुभएको छ ।  यता खडिखेतमा मंसिर पहिलो हप्तामा पुलको कामको सुरुवात गरिने भएको छ । २८ गते काठमाडौबाट टोली हिड्ने र ३० गते रिप गाउँमा पुग्ने भएको छ ।