जिल्ला अस्पतालमा बिरामी आउनेको संख्या वृद्धि

सिमकोट

मौषम परिवर्तनका कारण पछिल्लो समयमा जिल्ला अस्पतालमा बिरामीको चाप बढेको छ । जिल्ला अस्पताल हुम्लामा यो समयमा दैनिक ६० देखी ७० जना बिरामी उपचारका लागि ओपिडीमा आउन थालेको जिल्ला अस्पताल हुम्लाले जनाएको छ । आईतबार र सोमबार सबभन्दा बढि बिरामी चेकजाँच गर्न आउनेको संख्या बढेको जिल्ला अस्पताल हुम्लाका निमिक्त प्रमुख डाक्टर मनिस देबले जानकारी दिनुभएको छ ।

पुषको पहिलो हप्ता सम्म जिल्ला अस्पतालमा बिरामी एकदमै कम आउने गरेका थिए तर जिल्लाका दक्षिण क्षेत्रका गाउँपालिकामा बिरामी हुने बढेका थिए । पुषको १५, १६ गतेबाट जिल्ला अस्पतालमा सिजनल रुघाखोकीका बिरामी बढी आउने गरेको निमिक्त प्रमुख देबले बताउनु भएको छ । अस्पतालमा भर्ना गर्ने खालका बिरामी नभएपनि ओपिडिमा दैनिक चेकजाँच गर्न आउने बिरामीको संख्या एक दिनमा ७० जना सम्म पुग्ने गरेका छन ।

मौषममा परिवर्तन भएदेखी विगत केही दिनदेखि ज्वरो, रुघाखोकी, दम, टाइफाइड जस्ता रोगका बिरामीको संख्या बढेको अस्पताल स्रोतले जनाएको छ । यो चिसो मौषम भएको हुदा बिरामीको संख्या बढेको जनाइएको छ । अन्य दिर्घकालिन रोगका बिरामी र ज्वरो, रुघाखोकी, दम, टाइफाइड जस्ता बिरामी बढेका छन । यो मौषममा प्राय जसो बालबालिका, वृद्धवृद्धा, गर्भवती महिलालाई चिसोले समस्या बनाउने भएकाले न्यानो कपडा लगाउन र झोलिलो खानेकुरा खान निमिक्त प्रमुख डाक्टर मनिस देबले सुझाब दिनुभएको छ ।