निर्वाचन प्रहरीको फिजिकल परिक्षणबाट १ हजार ५२ जना उत्रिर्णः लिखित परिक्षा आज सकियो

सिमकोट
 
आगामी फागुन २१ गते हुने प्रतिनिधि सभा निर्वाचनका लागि नेपाल प्रहरीले थालेको भर्ना अभियानको फिजिकल तर्फ एक हजार ५२ जना उत्रिर्ण भएका छन् । एक सातादेखि शुरु भएको शारिरिक परिक्षणमा फारम भरेका एक हजार २ सय १६ जना मध्ये एक हजार ५२ जना मात्रै लिखित परिक्षाका लागि योग्य भएको जिल्ला प्रहरी कार्यालयका सूचना अधिकारी विष्णु प्रसाद श्रेष्ठले जानकारी दिनुभयो । 

उहाँका अनुसार हिजो प्रकाशित गरेको प्रारम्भीक सूचिमा सहभागि भएका आवेदकहरुका लागि आजै जिल्ला प्रहरी कार्यालयले लिखित परिक्षा लिएको छ । जिल्लाका लागि आवश्यक ५ सय ९४ सिटका लागि नेपाली प्रहरीले छनोट प्रक्रिया अघि बढाएको छ । आज लिएको लिखित परिक्षाको नतिजा भोली बिहानसम्म प्रकाशन गरेर त्यसपछि मौखिक परिक्षा सञ्चालन गर्ने जिल्ला प्रहरी कार्यालय हुम्लाले जनाएको छ । गाउँमा यूवाहरु माझ बढ्दै गएको बेरोजगार समस्याका कारण यो वर्ष माग भन्दा झण्डै तेब्बरको संख्यामा यूवाहरुले आवेदन भरेका थिए । शारिरिक रुपमा तौल, नाप तथा अन्य शारिरिक तन्दुरुस्तीका आधारमा एक हजार ५२ जनाको नाम छनोट गरिएको हो  । 

 निर्वाचन प्रहरीका लागि हुम्लाबाट कुल १ हजार २ सय १६ जनाले आवेदन दिएका थिए । तीमध्ये प्रारम्भिक स्वास्थ्य परीक्षण र शारीरिक सहनशीलता परीक्षाबाट १६२ जना अनुत्तीर्ण भएको सुचना अधिकारी श्रेष्ठले बताउनु भएको छ । उहाका अनुसार, प्रारम्भिक चरणमा उत्तीर्ण भएका उम्मेदवारहरूको लिखित परीक्षा माघ ८ गते बिहान ११ बजेबाट भएको हो । परीक्षा सिमकोट गाउँपालिका–५ मा रहेको सिमस्थित खेलमैदानमा सञ्चालन गरिएको थियो ।