सदरमुकाम सिमकोटमा खानेपानीको हाहाकार

सिमकोट

हुम्लाको मुटु मानिएको सदरमुकाम सिमकोटमा यतिबेला खानेपानीको चरम अभाव भएको छ । वर्षौंदेखि क्रमिक रूपमा दोहोरिँदै आएको पानीको समस्या अहिले झन् विकराल बन्दै गएपछि स्थानीय नागरिकहरू दैनिक जीवन सञ्चालनमा समस्या भोग्दै आएका छन् ।
बुधबारदेखि सिमकोट बजार क्षेत्रमा धारामा पानी आउन बन्द भएपछि यहाँका बासिन्दा बिहानदेखि साँझसम्म एक ग्यालिन पानी भर्नकै लागि घण्टौँ लाइनमा बस्नु पर्ने बाध्यता छ ।

सिमकोट गाउँपालिका–५ की बाँचु रावतका अनुसार पहिले कहिलेकाहीँ धारामा पानी आउने गरे पनि पछिल्ला दुई दिनदेखि बजार क्षेत्रका अधिकांश धाराहरू पूर्ण रूपमा सुक्खा जस्तै भएका छन् । 
“बिहान बेलुका खाना पकाउनका लागि भए पनि एक ग्यालिन पानी भर्न घण्टौँ लाइनमा बस्नुपर्ने अवस्था छ,” उहाँले दुःख व्यक्त गर्नुभयो ।

त्यस्तै बजारमै बसोबास गर्दै आएकी अदानचुली गाउँपालिकाकी रुप्सी सुनारले पनि पछिल्ला दिनहरूमा पानीको संकट झनै बढ्दो क्रममा रहेको गुनासो गर्नुभयो । उहाँका अनुसार पहिले कहिलेकाहीँ धारामा पानी आउने गरे पनि हिजोआज भने बजार क्षेत्रमा पानीको चरम हाहाकार देखिएको छ ।
पानी मानव जीवनको आधारभूत र अनिवार्य आवश्यकता भए पनि आफ्नै धारामा पानी नआउँदा सिमकोट बजार क्षेत्रका नागरिकहरू बिहानदेखि साँझसम्म कसको धारामा पानी आउँछ भनेर खोज्दै भौँतारिनु परेको छ ।

 सिमकोट गाउँपालिका–७ की झगमती शाहीका अनुसार पानी भर्नकै लागि लाइनमा बस्नु पर्ने बाध्यता बनेको छ । “साँझतिर बल्ल एक–दुई गाग्री पानी भरेर कोठा फर्किन्छौँ र त्यही पानीले खाना पकाएर दिन गुजार्नुपर्ने  बाध्यता भएको शाहीले गुनासो गर्नुभयो ।
स्थानीय बासिन्दाका अनुसार बजार क्षेत्रमा पानी वितरणमा समेत असमानता देखिएको छ । कतिपय घरका धारामा पानी आउँदैन भने कतै चौबिसै घण्टा पानी बगिरहेको देखिन्छ । कतिपय ठाउँमा धारा नै बिग्रिएको, कतै टुटी नै नलगाइ पानी खेर जाने गरेको भन्दै पानीको व्यवस्थापनमा कमजोरी भएको नागरिकहरूले गुनासो गरेका छन् ।

यता पुरै बजार क्षेत्र पानीको चरम अभावले आक्रान्त भइरहेको बेला सम्बन्धित खानेपानी उपभोक्ता समितिका कर्मचारी भने समस्या समाधानतर्फ अपेक्षित रूपमा सक्रिय नदेखिएको भन्दै स्थानीयहरूले असन्तुष्टि व्यक्त गरेका छन् ।
स्थानीय नागरिकहरूका अनुसार सिमकोटको दीर्घकालीन खानेपानी समस्याको समाधानका लागि स्थानीय सरकार तथा सम्बन्धित खानेपानी कार्यालयले गम्भीर रूपमा पहल गर्नुपर्ने आवश्यकता झनै तीव्र रूपमा महसुस गरिएको छ ।
हिमाली जिल्लाको मुटुमा बसेका नागरिकहरू पानीकै अभावमा दिन गुजार्न बाध्य भएको यो पीडादायी यथार्थले सरोकारवाला निकायलाई छिटो समाधान खोज्न झक्झक्याइरहेको छ ।