सामाजिक विकास कार्यालयद्धारा कार्यालयको सेवा एउटै कार्यकक्षबाट प्रदान

सिमकोट

हुम्लाको सामाजिक विकास कार्यालयद्वारा कार्यालयको एउटा कोठाबाट सेवा प्रदान गर्ने कार्य सुरु गरिएको छ । सेवाग्राहीहरुले एउटा कोठाबाट अर्को कोठामा धाइरहनु पर्ने बाध्यताबाट छुटकारा पाउनका लागी यो कामका थालनी गरिएको सामाजिक विकास कार्यालय प्रमुख ईश्वर बहादुर सिंहले जनाकारी दिनुभयो ।
‎‎सेवाग्राहीहरु सेवा लिन चार वटा कार्य कक्षमा पुग्नु पर्ने र कुनै कागजात र प्रकृया नमिले पुन ः जानु परि रहेपछि यस्तो झन्झटबाट छुटकारा पाउनकै लागि एउटा कार्य कक्षबाट सेवा प्रदान गर्न सुरु गरेको कार्यालय प्रमुख सिंहले बताउनुभयो । 

‎उहाँका अनुसार एक जना सेवाग्राहीले सुरुमा कागजातमा तोक लगाउन कार्यालय प्रमुखको कार्यकक्षमा जानु पर्ने, त्यसपछि प्रशासनको दर्ता चनालीमा जानु पर्ने, त्यसपछि योजना शाखामा जानु पर्ने र अन्तमा लेखा शाखामा जानु पर्ने र यो अवधिमा आवश्यक कागजात नपुगे वा नमिले पून सम्वन्धित फाँटमा जानु पर्ने भएपछि झन्झट हुने र यो झन्झटबाट सेवाग्राहीलाई मुक्ती दिन एउटै कार्य कक्षमा कार्यालय प्रमुखदेखि अन्य तीन वटा फाँटका कर्मचारी बसेर एकिकृत सेवा दिन सुरु गरिएको छ ।

‎सेवाग्राहीका कागजात नमिले वा नपुगे कार्यस्थल मै थाहा हुने र फाँट फाँटमा दौडी रहनु पर्ने बाध्यता यो कार्यले हटेको उहाँले बताउनुभयो । ‎यसअघि सेवाग्राहीले भोग्नु परि रहेको झन्झटलाई मध्यनजर गरि कार्यालयका कर्मचारीको सल्लाहमा यसरी सेवा दिन सुरु गरिएको उहाँले बताउनुभयो । ‎
‎कार्यालयको यो कार्यले सेवाग्राहीको समय पनि बचत र खर्चबाट पनि जोगिन सहयोग पुगेको छ । बिहिबार मात्र उक्त कार्यालयले दश जना सेवाग्रहीहरुलाई एउटै कार्यकक्षमा सेवा प्रदान गरेको थियो ।‎