संघीय अनुदान अन्तरगत ९ महिनामा हुम्लाको खर्च आधा मात्रै

 सिमकोट

चालु आर्थिक वर्षका ९ महिना बित्दा पनि हुम्लामा संघीय सरकारबाट आउने बजेटको आधा मात्रै खर्च भएको छ । असार मसान्तमा मात्रै बजेट खर्च हुने हुम्लाको पुरानो विकासे प्रवृतीका कारण यो वर्षपनि जिल्लामा केन्द्र सरकारबाट विभिन्न शिर्षकमा आएको बजेटको आधा रकम अहिलेसम्म खर्च नभएको कोष तथा लेखा नियन्त्रक कार्यालय हुम्लाले जनाएको छ ।

कोष तथा लेखा नियन्त्रकका अनुसार  जिल्लामा आएको बजेटको चालुतर्फ ३ अर्ब ३० करोड २२ लाख ९१ हजार ६ सय २८ रकम मध्ये यो अवधीमा २ अर्ब ४ करोड ८० लाख ८३ हजार १ सय २ रुपौया खर्च भएको छ । यो कुल विनियोजित बजेटको ६५ प्रतिशत हो । कर्मचारीको तलव भत्ता र कार्यालय सञ्चालन खर्चका रुपमा मानिने चालु खर्च भने विकासे बजेट भन्दा बढि छ । जिल्लाको विकासे बजेटका रुपमा मानिने पुँजीगत तर्फ ८१ करोड ४७ लाख ८० हजार मध्ये २९ करोड १२ लाख ७७ हजार ४ सय ५४ रुपैया खर्च भएको छ ।

यो कुल बजेटका ३५.७४ प्रतिशत रहेको कोष तथा लेखा नियन्त्रक कार्यालय हुम्लाका प्रमुख अंग बहादुर कार्कीले जानकारी दिनुभयो । समय अनुसार जिल्लाको विकासे बजेट निकै कम छ । चालु तर्फ बजेटको खर्च राम्रै भएपनि विनियोजित बजेट मध्ये पुँजिगत तर्फ निकै कम भएका प्रतिक्रियां कोष तथा लेखा नियन्त्रण कार्यालयका प्रमुख कार्कीले दिनुभएको छ ।.