समयमै औषधी नपुग्दा भिटामिन ‘ए’ र जुकाको औषधी खुवाउने अभियान प्रभावित

सिमकोट

नेपाल सरकारले भोली बैशाख ६ र ७ गते बालबालिकालाई भिटामिन ‘ए’ र जुकाको औषधि खुवाउने अभियान सञ्चालन गर्ने निर्णय गरेपनि हुम्लामा यो अभियान सञ्चालन नहुने भएको छ । हुम्लामा समयमै भिटामिन ए र जुकाको औषधी नपुग्दा यो अभियान प्रभावित हुने भएको जिल्ला स्वास्थ्य सेवा कार्यालय हुम्लाले जनाएको छ । 
राज्यले काठमाडौ र हुम्लालाई हेर्ने दृष्टिकोण एउटै भएकाले हुम्लामा यो समस्या निम्तीएको जिल्ला स्वास्थ्य सेवा कार्यालय हुम्लाका प्रमुख डाक्टर उमाकान्त तिवारीले बताउनु भएको छ । एक हप्तादेखी हुम्लामा कुनैपनि जहाजले उडान नभरेपछि भिटामिन ए र जुकाको औषधी नेपालगञ्ज एयरपोटमा थन्किएर राखेको प्रमुख तिवारीले बताउनु भयो । 
नेपालगञ्ज देखी हुम्लाका लागी आज सिता एयरको फलाइटमा औषधी ल्याउने भनिएपनि विविध कारणले जहाजमा समस्या देखाएपछि औषधी नेपालगञ्जमै थन्किएको प्रमुख तिवारीको भनाई रहेको छ । यदि भोलीसम्म हुम्लाका लागी जहाज नआएपछि गाडी मार्फत औषधी ल्याएर हुम्लाका बालबालिकालाई भिटामिन ‘ए’ र जुकाको औषधी खुवाउने भएको प्रमुख डाक्टर तिवारीले बताउनु भयो ।

स्वास्थ्य तथा जनसंख्या मन्त्रालयले राष्ट्रिय भिटामिन कार्यक्रम अन्तर्गत ६ महिनादेखि ५९ महिनासम्मका बालबालिकालाई भिटामिन ‘ए’ तथा १२ महिनादेखि ५९ महिनासम्मका बालबालिकाकालाई जुकाको औषधि खुवाउने तयारी गरेको छ । भिटामिन ‘ए’ क्याप्सुल सन् १९९३ देखि र भिटामिन ‘ए’सँगै जुकाको औषधि सन् २००१ देखि खुवाउन थालिएको हो । वर्षमा दुईपटक पहिलो चरणमा २ र ३ कात्तिक तथा दोस्रो चरणमा ६ र ७ वैशाखमा बालबालिकालाई भिटामिन ‘ए’ र जुकाको औषधि खुवाउने गरिन्छ ।