सार्वजनिक बिदामा पनि जिल्ला प्रशासनबाट सेवा प्रवाह गर्ने

सिमकोट

जिल्ला प्रशासन कार्यालय हुम्लाले सार्वजनिक बिदाका दिनमा पनि कार्यालयबाट सेवा प्रवाह गर्ने भएको छ । कार्यालयले वर्षभरी पर्ने सार्वजनिक बिदाका दिनमा पनि सेवाग्राहीलाई सेवा प्रवाह गरिने भएको छ । 
नेपाल सरकारको राजपत्रमा प्रकाशित सुचनाका आधारमा २०८३ सालमा पर्ने सार्वजनिक बिदाको दिन पनि सेवा प्रवाह हुने भएको सहायक प्रमुख जिल्ला अधिकारी राजेन्द्र कुमार चन्दले जानकारी दिनुभएको छ । सहायक प्रमुख जिल्ला अधिकारी चन्दका अनुसार सार्वजनिक बिदाको दिन पनि नागरिकता, राहदानी र राष्ट्रिय परिचय पत्रको सेवा प्रवाह हुनेछ । 

२०८३ बैशाख ४ गतेको राजपत्रमा प्रकाशित सूचना बमोजिम सार्वजनिक सेवा प्रवाहमा विशेष व्यवस्था भए अनुसार नागरिकता, राष्ट्रिय परिचय पत्र र राहदानीका सेवाहरू सार्वजनिक बिदाका दिनमा समेत प्रवाह गरिने सहायक प्रमुख जिल्ला अधिकारी चन्दले बताउनु भएको छ । प्रशासन कार्यालयका अनुसार सार्वजनिक बिदा रहेका १६ दिनमा कार्यालयले सेवा दिनेछ । 

वैशाख १८ गतेको बैशाख पुर्णिमा, उभौली पर्व, बद्ध जयन्ती, र जेठ १५ गतेको गणतन्त्र दिवस, भदा १२ गते पर्ने रक्षा बन्धन, भदौ १९ गतेको श्रीकृष्ण जन्माष्टमी, असोज २५ गतेको घटस्थापना, पुस ९गते पर्ने उँधौली पर्व तथा योमरी पुन्हि, पुस १० गतेको क्रिसमस डे र पुस १५ गतेको तमु ल्होसार, पुस २७ गते  पृथ्वी जयन्ती, माघ १ गते माघे सङ्क्रान्ती, माघ २४ गते सोनाम ल्होसार, फागुन ७ गते राष्ट्यि प्रजातन्त दिवस, फागुन २४ गते अन्तराष्ट्यि महिला दिवसका दिन कार्यालयबाट सेवा प्रवाह हुने छ । दसैँ, तिहारको बिदामा भने सबै सेवा बन्द रहने छन् । सार्वजनिक बिदाका दिनमा समेत सेवा प्रवाह हुने भएपछि सेवाग्राहीलाई सहज हुने भएको छ ।