सुख्खा पहिरोका कारण कर्णाली करिडोर अन्र्तगत खच्चा सडक अवरुद्ध, सवारी साधन जाममा

सिमकोट
हुम्लाको सर्केगाड गाउँपालिका वडा नम्बर १ खच्चा क्षेत्रमा पर्ने कर्णाली करिडोर सडक खण्डमा सुख्खा पहिरो खस्दा सडक अवरुद्ध भएको छ । आज बिहान ८ बजे सडक माथिबाट अचानक सुख्खा पहिरो खसेपछि उक्त सडक खण्ड पूर्ण रूपमा बन्द भएको हो । पहिरोका कारण दुबै तर्फ गरी करिब ४–५ वटा सवारी साधन जाममा परेका छन् । 

सडकमा सुख्खा पहिरो खसेको जानकारी प्राप्त हुने बिक्तिकै अस्थायी प्रहरी पोष्ट तुम्च, हुम्लाबाट प्रहरी सहायक निरीक्षक टेक राज पाण्डेयको कमाण्डमा ४ जनाको प्रहरी टोली उक्त सडक खण्डमा खटिएको छ । सडक खुलाउने कार्यका लागि जेसीबी परिचालन गर्ने प्रयास भइरहेको छ भने सर्केगाड गाउँपालिकाको जेसीबी तेसतर्फ जाँदै गरेको जानकारी प्राप्त भएको छ ।

उक्त सडकमा सुख्खा पहिरो खस्दा दुबै तर्फका एक दर्जन भन्दा बढी सवारी साधान रोकिएको स्थानिय डिल बहादुर कार्कीले बताउनु भएको छ । सडकमा सुख्खा पहिरो खस्दा करिब एक घण्टा बढीसम्म पैदल हिडेर गाडी भएको ठाउँमा पुग्नु परेको स्थानिय कार्कीले जानकारी दिनुभएको छ । उक्त सडक खण्डमा पटक पटक सुख्खा पहिरो खस्दा यात्रुलाई आवात जावातमा समस्या बनाएको छ ।