मानसरोवर माध्यमिक विद्यालयमा आइसिटी कम्प्युटर ल्याबको उद्घाटन

सिमकोट 

सिमकोट गाउँपालिकामा रहेको मानसरोवर माध्यमिक विद्यालयमा आइसिटी कम्प्युटर ल्याबको उद्घाटन गरिएको छ । कर्मफ्लाइट फाउन्डेसन पोखरा र एडुटेक नेपाल ललितपुरको प्राविधिक सहयोगमा स्थापना गरिएको उक्त कम्प्युटर ल्याबका लागि आवश्यक फर्निचर (टेबल, पर्दा, कुर्सी) सिमकोट गाउँपालिकाले उपलब्ध गराएको मानसरोवर माध्यमिक विद्यालयका प्रध्यानध्यापक अमर बहादुर शाहीले बताउनु भएको छ ।

 मानसरोवर माध्यमिक विद्यालयका कक्षा १ देखि १२ सम्मका विद्यार्थीहरूलाई लक्षित गर्दै सञ्चालनमा ल्याइएको यो ल्याबमा हाल २८ जना विद्यार्थी र १ जना शिक्षक प्रत्यक्ष रूपमा सहभागी हुनेछन् । नियमित कक्षापछि कम्प्युटर शिक्षा प्रदान गरिने व्यवस्था गरिएको विद्यालयका प्रध्यापक शाहीले जानकारी दिनुभयो ।

विद्यालय व्यवस्थापन समितिका अध्यक्ष मान बहादुर रोकायाको अध्यक्षतामा सम्पन्न उद्घाटन कार्यक्रममा स्थानीय सरोकारवाला निकाय शिक्षक, विद्यार्थीहरूको उपस्थिति रहेको थियो । यस ल्याब स्थापना भएसँगै दुर्गम क्षेत्रका विद्यार्थीहरूलाई सूचना प्रविधिसम्बन्धी ज्ञान र सीप हासिल गर्न सहज हुने अपेक्षा गरिएको छ  प्रध्यानध्यापक शाहीको भनाई रहेको छ ।