जेष्ठ नागरिकका लागी मनोरञ्जन तथा सचेतना कार्यक्रम सिमकोटमा सञ्चालन

सिमकोट 
जेष्ठ नागरिकहरूको सम्मान र अधिकारबारे सचेतना अभिवृद्धि गर्ने उद्देश्यले सिमकोटस्थित मानसरोवर होटलमा एक कार्यक्रम सञ्चालन भएको छ । सामाजिक विकास कार्यालय हुम्लाको आर्थिक सहयोग तथा जेष्ठ नागरिक समाज हुम्लाको आयोजनामा कार्यक्रम सञ्चालन गरिएको हो ।

कार्यक्रमको उद्घाटन जिल्ला न्यायाधीश नीलकण्ठ बरालले ब्यानर वाचन गर्दै गर्नुभएको थियो भने सभाध्यक्ष अदानसिंह रावत रहनु भएको थियो । कार्यक्रममा “जेष्ठ नागरिकको सम्मानः हाम्रो सभ्यताको पहिचान” भन्ने नारा प्रस्तुत गरिएको थियो ।

कार्यक्रममा जेष्ठ नागरिक जिल्ला संघका उपाध्यक्ष धर्मराज रोकायाले स्वागत मन्तव्य राख्दै जेष्ठ नागरिकको परिभाषा र उनीहरूको सम्मान तथा संरक्षणका विषयमा जोड दिनुभयो । आयुर्वेद केन्द्रकी प्रमुख चाहाना शर्माले कार्यक्रममा सहभागी जेष्ठ नागरिकहरूलाई तुलसी चिया, अश्वगंधा चुर्ण र अर्थोरेक्स तेल (दर्द निवारक तेल) वितरण गर्नुभएको थियो । 

प्रमुख जिल्ला अधिकारी टेककुमार रेग्मीले जेष्ठ नागरिकलाई जिल्ला प्रशासन कार्यालयबाट उपलब्ध गराइने सेवा–सुविधाबारे जानकारी दिँदै यातायात तथा अन्य असहज परिस्थितिमा प्रशासन सधैं सहयोगका लागि तयार रहने प्रतिबद्धता व्यक्त गर्नुभयो । साथै उहाँले अन्तरपुस्ता ज्ञान, सीप, कला र परम्परागत रीतिरिवाज हस्तान्तरणमा स्थानीय तहको भूमिका महत्वपूर्ण रहने बताउनुभयो ।

यसैगरी, जिल्ला न्यायाधीश नीलकण्ठ बरालले जेष्ठ नागरिकसँग सम्बन्धित ऐन–कानुनबारे प्रष्ट पार्नुभएको थियो । सामाजिक विकास कार्यालयका प्रमुख ईश्वर बहादुर सिंहले सिमकोटमा जेष्ठ नागरिक भवन निर्माण हुने जानकारी दिँदै अदानचुली गाउँपालिकामा सामाजिक विकाससँग सम्बन्धित संरचना निर्माण भइरहेको बताउनुभयो ।

उक्त कार्यत्रममा जेष्ठ नागरिक आमा बुवाले आफ्नो रितिरिवाजका बारेमा जानकारी दिनुभएके थियो साथै देउडा गित र लामा भाषाबाट रलिङ मेलामा गरिने स्वागत गित पनि गाउनु भएको थियो । कार्यक्रममा सिमकोट गाउँपालिका वडा नं. ४ का करिब २५ जना ८० वर्ष भन्दा माथिका जेष्ठ नागरिकहरूको सहभागिता रहेको थियो ।