सिमकोट गाउँपालिकाका विद्यालयहरूको अनुगमन सम्पन्न

सिमकोट 

सिमकोट गाउँपालिकाको विद्यालय समायोजन तथा शिक्षक व्यवस्थापन शिक्षा उपसमितिले गाउँपालिका अन्तर्गत रहेका २१ वटा  सामुदायिक विद्यालयको अनुगमन सम्पन्न गरेको छ । शैक्षिक सुधार, न्यायोचित शैक्षिक पहुँच, भौतिक पूर्वाधार तथा समग्र शैक्षिक अवस्थाको अध्ययन गर्ने उद्देश्यले अनुगमन गरिएको हो ।

विद्यालय समायोजन तथा शिक्षक व्यवस्थापन शिक्षा उपसमितिका संयोजक प्रताप लामाको नेतृत्वमा विद्यालयहरूको पठनपाठन अवस्था, शिक्षक–विद्यार्थी उपस्थिती, शैक्षिक सामग्रीको उपलब्धता, तथा भौतिक संरचनाको अवस्थाबारे निरीक्षण गरेको शिक्षा युवा तथा खेलकुद शाखा प्रमुख कृष्ण आचार्याले बताउनुभएको छ । साथै, विद्यालय व्यवस्थापन, शिक्षण गुणस्तर र विद्यार्थी सिकाइ उपलब्धि सुधारका लागि आवश्यक सुझाव तथा सल्लाह समेत प्रदान गरिएको छ ।

अनुगमन टोलीका अनुसार विद्यालयमा देखिएका समस्या पहिचान गर्दै सुधारका लागि आवश्यक कदम चालिने र सम्बन्धित निकायसँग समन्वय गरी शैक्षिक गुणस्तर उकास्ने प्रयास गरिनेछ ।
यस अनुगमनले स्थानीय तहमा शिक्षा क्षेत्रमा देखिएका चुनौती समाधान गर्न र समग्र शैक्षिक प्रणाली सुधारमा टेवा पुग्ने अपेक्षा गरिएको छ । बैशाख १६ गतेबाट यो अनुगमनको शुरुवात गरिएको हो ।