जिल्ला स्तरिय १६ औ राष्ट्रपति रनिङ्ग शिल्ड प्रतियोगिता आजबाट संचालन सुरु

सिमकोट 
हुम्लाको सिमकोटमा १६ औँ जिल्ला स्तरीय राष्ट्रपति रनिङ शिल्ड प्रतियोगिता आजदेखि सुरु भएको छ । “राष्ट्रका लागि खेलकुद, स्वास्थ्यका लागि खेलकुद” भन्ने मूल नाराका साथ सिमकोटस्थित खेल मैदानमा आज दिउँसो १२ बजेदेखि प्रतियोगिता सञ्चालनमा आएको हो ।

सामाजिक विकास कार्यालय हुम्लाका प्रमुख ईश्वर बहादुर सिंहका अनुसार जिल्लाका सात वटै स्थानीय तह अन्तर्गतका माध्यमिक विद्यालयका विद्यार्थीहरूको सहभागिता रहेको छ । प्रतियोगितामा एथलेटिक्स अन्तर्गतका विभिन्न विधासहित भलिबल, दौड, कबड्डी लगायत १३ प्रकारका खेलहरू समावेश गरिएका छन्।
प्रतियोगिता सञ्चालन, व्यवस्थापन तथा सहजीकरणको जिम्मेवारी बालमन्दिर माध्यमिक विद्यालय सिमकोटलाई दिइएको छ। साथै, सह–आयोजकको रूपमा जिल्ला खेलकुद विकास समिति रहेको छ भने आयोजक सामाजिक विकास कार्यालय हुम्ला रहेको छ।

कार्यक्रमका अध्यक्ष तथा सामाजिक विकास कार्यालयका प्रमुख सिंहले छोटो समयको तयारीका बाबजुद सबै पालिकाबाट सहभागिता जनाइएकोमा धन्यवाद व्यक्त गर्नुभयो। उहाँले बैशाख २७ र २८ गते सुर्खेतमा हुने प्रदेशस्तरीय प्रतियोगितालाई लक्षित गर्दै जिल्लास्तरीय खेल आयोजना गरिएको बताउनुभयो ।

त्यसैगरी, कार्यक्रमका प्रमुख अतिथि सिमकोट गाउँपालिका अध्यक्ष विजय भण्डारीले सबै खेलाडीलाई इमान्दारी पूर्वक खेल्दै आफ्नो क्षमता प्रदर्शन गर्न आग्रह गर्नुभयो । तीन दिनसम्म सञ्चालन हुने यो प्रतियोगिता बैशाख २४ गतेसम्म जारी रहनेछ ।

आज पहिलो दिन १ सय मिटरको दौड छात्रतर्फ प्रथम सिमकोट गाउँपालिकाका विवेक शाही, दृतिय ताजाँकोट गाउँपालिकाका रोशन सार्की र तृतिय चंखेली गाउँपालिकाका उज्वल चौलागाई भएका छन भने ८ सय मिटर दौडमा प्रथम चंखेली गाउँपालिकाका दिपेश चौलागाई, दृतिय सिमकोट गाउँपालिकाका बखत सुनार र तृतिय सर्केगाड गाउँपालिकाका सोबास फडेरा भएको जिल्ला खेलकुल विकास समितिका कार्यालय प्रमुख प्रकाश बुढाले बताउनु भएको छ ।