वल्डिङ सेवा अवरुद्ध हुँदा खार्पुनाथको १ नम्बर वडामा सेवा ठप्प, सेवाग्राही मारमा

सिमकोट

जिल्लाको खार्पुनाथ गाउँपालिका वडा नं. १ लालीमा जडान गरिएको वल्डीङ (इन्टरनेट सेवा) एक हप्तादेखि अवरुद्ध हुँदा वडा कार्यालयबाट प्रदान गरिने अनलाइन सेवा पूर्ण रूपमा ठप्प भएको छ । इन्टरनेट सेवा बन्द भएपछि जन्मदर्ता, मृत्युदर्ता, विवाह दर्ता लगायतका सबै प्रकारका पञ्जिकरण सेवा प्रभावित बनेका छन् ।

वडा नं. १ का वडा अध्यक्ष जय बहादुर शाहीका अनुसार सेवा अवरुद्ध हुँदा स्थानीय नागरिकहरू आवश्यक कामका लागि करिब तीन घण्टा पैदल हिँडेर गाउँपालिका केन्द्र धाउनु पर्ने बाध्य भएमा छन् ।“वडामा सेवा सञ्चालन गर्ने वातावरण भए पनि इन्टरनेट नहुँदा सबै काम रोकिएको छ,” वडा अध्यक्ष शाहीले भन्नुभयो, “सम्बन्धित निकायमा पटक–पटक जानकारी गराउँदा पनि कुनै सुनुवाइ भएको छैन।” पालिकाबाट पञ्जिकरणका काम सम्पन्न गरेपछि हस्ताक्षरका लागि पुनः वडा कार्यालयमै आउनुपर्ने बाध्यता हुँदा सेवाग्राही थप समस्यामा परेका छन् ।

यसैबीच, खार्पुनाथ गाउँपालिका वडा नं. ३ रायाको थानामा रहेको नमस्ते टावर समेत एक हप्ताभन्दा बढी समयदेखि बन्द रहेको स्थानीयले बताएका छन् । टावर अवरुद्ध हुँदा उक्त क्षेत्रमा सञ्चार सेवा समेत प्रभावित भएको छ । स्थानीयका अनुसार समस्या समाधानका लागि नेपाल टेलिकम सिमकोटलाई जानकारी गराए पनि हालसम्म कुनै पहल नभएको गुनासो गरिएको छ । इन्टरनेट र सञ्चार सेवा दुवै अवरुद्ध हुँदा दैनिक प्रशासनिक कार्य र जनजीवनमा समेत असर परेको वडा अध्यक्ष शाहीले बताउनु भएको छ ।