काठको मुडाले च्यापेर एक जना बालकको मृत्यु, २ जना प्रहरीको नियन्त्रणमा

सिमकोट 
काठ च्यात्ने क्रममा काठको मुडा लागेर एक जना बालकको मृत्यु भएको छ । सर्केगाड गाउँपालिका वडा नं ८ फुचा गाउँका जोगविर बुढाका १४ वर्षिय छोरा कविन्द्र बुढाको मृत्यु भएको छ । जिल्लाको सर्केगाड गाउँपालिका वडा नं ८ मा रहेको निलकण्ठ आधारभुत विद्यालय फुचामा कक्षा ७ मा अध्ययनरत बुढा भेडा चराउन गएको बेला काठको मुढाले च्यापेर मुत्यु भएको जिल्ला प्रहरी कार्यालय हुम्लाका प्रहरी नायव उपरिक्षक शंकर खड्काले बताउनु भएको छ । 

बिहिबार  विहान ११ वजे भेडा बाख्रा चरि चरनका लागी सोही गाउँपालिकाको वडा नं ८ को भुलभुले पानी भन्ने ठाउँमा लिएको समयमा काठ चिरान दरान गरी रहेका सोही गाउँपालीका वडा नं ८ का ३९ वर्षिय धनबिर सार्की र सोही ठाउँकै २८ वर्षिय सुकबिर सार्कीले काठको मुडा पल्टाउदा तल जंगलमा रहेका बालकलाई लागी करिव १ सय मिटर तल सिप्का खोलामा फालेको उपरिक्षक खड्काले जानकारी दिनुभयो । लाश मुचुल्का  लागी जिल्ला प्रहरी कार्यालयको टोली घटना स्थलमा जाँदै गरेको खड्काले बताउनु भयो ।  सुकबिर सार्की र  धनबिर सार्कीलाई प्रहरीले नियन्त्रणमा लिएको जानकारी प्राप्त भएको छ ।