विपद व्यवस्थापन समितिको बैठक बस्यो, पुर्व तयारीका साथ बस्न आग्रह

सिमकोट

विपद व्यवस्थापन समितिको बैठक सम्पन्न भएको छ । बिहीबार बिहान विपद् व्यवस्थापन समितिका संयोजक तथा प्रमुख जिल्ला अधिकारी टेक कुमार रेग्मीको नेतृत्वमा बैठक बसेको हो ।
बैठकमा जिल्ला विपद् व्यवस्थापन समितिका यसअघिका निर्णयहरूको कार्यान्वयन अवस्थाबारे समीक्षा तथा विश्लेषण गरिएको थियो । साथै वर्षायाम तथा मनसुनको समयमा मा हुने आवागमनलाई निर्वाध रूपमा सञ्चालन गर्न आवश्यक स्रोत–साधन व्यवस्थापनका लागि हिल्सा–सिमकोट सडक आयोजनालाई अनुरोध गर्ने निर्णय गरिएको छ ।

पूर्वमनसुन सुरु भएसँगै अविरल वर्षा, बाढी, पहिरो तथा चट्याङका घटनाबाट ठूलो जनधनको क्षति हुन सक्ने सम्भावना रहेकाले जोखिम न्यूनीकरण तथा विपद् व्यवस्थापनका कार्यलाई प्रभावकारी बनाउन सरोकारवालाबीच समन्वय र सहकार्य गर्ने निर्णय पनि बैठकले गरेको छ ।

सहायक प्रमुख जिल्ला अधिकारी राजेन्द्र कुमार चन्दका अनुसार नेपाली सेना, नेपाल प्रहरी, सशस्त्र प्रहरी बल नेपाल तथा हुम्लाको सहकार्यमा बाढी तथा पहिरोका घटनामा आधारित कृत्रिम अभ्यास सञ्चालन गरिने भएको छ । यसबाट खोज, उद्धार, राहत तथा विपद् व्यवस्थापन सम्बन्धी कार्यलाई प्रभावकारी बनाइने बताउदै भन्नुभयो .

त्यसैगरी जिल्लामा पर्यटक आगमनको सिजन सुरु भएकाले नाम्खा गाउँपालिकाको लाप्चा उपत्यका अन्तर्गत पर्ने न्यालु लेक क्षेत्रमा जमेको हिउँ पन्छ्याउन आवश्यक स्रोत–साधन व्यवस्थापन गर्न नाम्खा गाउँपालिका र पूर्वाधार विकास कार्यालयलाई अनुरोध गरिएको छ ।
उक्त कार्यक्रममा जिल्लाका सिमकोट, नाम्खा, खार्पुनाथ, सर्केगाड र ताजाँकोटका अध्यक्षहरू, सरकारी कार्यालयका प्रमुख, जिल्ला समन्वय समितिका प्रतिनिधि, नागरिक समाज, सुरक्षाकर्मी तथा राजनीतिक दलका प्रतिनिधिहरूको सहभागिता रहेको थियो ।