गरिब तथा विपन्न विद्यार्थीलाई खाद्यान्न, लत्ता कपडा र भाँडाकुँडा सहयोग

गरिब तथा विपन्न विद्यार्थीलाई खाद्यान्न, लत्ता कपडा र भाँडाकुँडा सहयोग

सिमकोट

गुड नेर्वस इन्टरनेसनल हुम्लाको आर्थिक सहयोग तथा किर्डाक नेपाल हुम्लाको समन्वयमा हुम्लाका गरिब तथा विपन्न परिवारका विद्यार्थीलाई खाद्यान्न, लत्ता कपडा तथा भाँडाकुँडा सहयोग गरिएको छ ।
बालबालिकाको शिक्षा र संरक्षण क्षेत्रमा लामो समयदेखि काम गर्दै आएको संस्थाले शुक्रबार आयोजित एक कार्यक्रममार्फत ११ जना विद्यार्थीलाई आवश्यक सामग्री वितरण गरेको हो । कार्यक्रम गुड नेवर्स इन्टरनेसनल हुम्लाका संयोजक गोविन्द चौधरीकोे अध्यक्षतामा सम्पन्न भएको थियो ।

उक्त सहयोग प्राप्त गर्नुभएकी सिमकोट गाउँपालिका वडा नम्बर ६ की सुना सुनारले आर्थिक अभावका कारण नातिको पालनपोषण र पढाइ सञ्चालन गर्न कठिन भइरहेको अवस्थामा संस्थाको सहयोगले ठूलो राहत मिलेको बताउनुभयो । उहाँले एक्लै नातीको पठन पाठन  धान्दै आएको उल्लेख गर्दै यस्ता सहयोगले बालबालिकाको भविष्य उज्यालो बनाउन मद्दत पुग्ने धारणा राख्दै भन्नुभया ।

त्यसैगरी सिमकोट वडा नम्बर ७ का नरेन्द्र सुनारले बुवाको निधन र आमाले दोस्रो विवाह गरेपछि आफ्नो पढाइ प्रभावित भएको बताउनुभयो । पछिल्लो समय संस्थाले कापी, कलम, झोला तथा विद्यालय पोशाक सहयोग गरेपछि नियमित रूपमा विद्यालय जान सहज भएको उहाँको भनाइ छ ।

सिमकोट गाउँपालिका वडा नम्बर ६ की मैता सुनारले श्रीमानको मृत्यु भएपछि परिवारको सम्पूर्ण जिम्मेवारी आफूमाथि आएको बताउँदै खाद्यान्न, कपडा तथा भाँडाकुँडा सहयोगले दैनिक जीवन र छोराछोरीको पठनपाठनमा राहत पुगेको बताउनुभयो । यस्ता सहयोगले बालबालिकाको शिक्षामा अवरोध नआउने विश्वास उहाँले व्यक्त गर्दै भन्नुभयो ।

गुड नेवर्स इन्टरनेसनल हुम्लाका संयोजक गोविन्द चौधरीका अनुसार संस्थाले हाल हुम्लाका १ हजार ३ सय ४१ जना बालबालिकालाई विभिन्न क्षेत्रमा सहयोग गर्दै आएको छ । तीमध्ये अति विपन्न र गरिब परिवारका ११ जना विद्यार्थी छनोट गरी करिब ३ लाख ९ हजार ९ सय ९९ रुपैयाँ बराबरको सामग्री सहयोग गरिएको उहाँले जानकारी दिनुभयो ।

बालबालिकाको पढाइमा आर्थिक अभावका कारण कुनै बाधा नपरोस् भन्ने उद्देश्यले सहयोग गरिएको उल्लेख गर्दै चौधरीले अभिभावकलाई बालबालिकालाई नियमित विद्यालय पठाउने वातावरण बनाउन आग्रह गर्नुभयो ।
यस सहयोगले गरिब तथा विपन्न परिवारका विद्यार्थीलाई राहत मिल्नुका साथै उनीहरूको शिक्षा निरन्तरतामा सकारात्मक सहयोग पुगेको स्थानीयले बताएका छन् ।