एसईईमा उत्कृष्ट नतिजा ल्याउने दुई विद्यार्थीलाई किर्डाक नेपालको प्रोत्साहन सहयोग ।।

सिमकोट
गुड नेवर्स इन्टरनेशनल नेपालको आर्थिक सहयोगमा किर्डाक नेपाल हुम्लाले सञ्चालन गर्दै आएको नियमित कार्यक्रम अन्तर्गत हुम्लाका दुई जना उत्कृष्ट विद्यार्थीलाई प्रोत्साहन स्वरुप नगद सहयोग गरिएको छ । एसईई २०८२ मा सहभागी भएका स्पोन्सर कार्यक्रम अन्तर्गतका ५६ जना बालबालिकामध्ये उत्कृष्ट नतिजा हासिल गर्ने विद्यार्थीलाई सम्मान तथा प्रोत्साहन गरिएको हो ।

खर्पुनाथ गाउँपालिका वडा नम्बर–५ स्थित सीता माध्यमिक विद्यालयबाट एसईई परीक्षा दिएका छात्र अनिल रोकायाले ३.७७ जीपीए ल्याई प्रथम स्थान हासिल गरेका छन् । उनलाई किर्डाक नेपाल हुम्लाले १५ हजार रुपैयाँको चेक हस्तान्तरण गरेको छ ।

त्यसैगरी, खर्पुनाथ गाउँपालिका वडा नम्बर–३ स्थित मानसरोवर माध्यमिक विद्यालयकी छात्रा रोजिना रावलले ३.५१ जीपीए ल्याई दोस्रो स्थान हासिल गरेकी छन् । उनलाई पनि सोही रकम बराबरको प्रोत्साहन सहयोग प्रदान गरिएको किर्डाक नेपाल हुम्लाका संयोजक जनक बुढाले जानकारी दिनुभएको छ ।

एक जना छात्र र एक जना छात्रालाई प्रदान गरिएको उक्त सहयोगले विद्यार्थीलाई थप अध्ययनमा प्रेरणा मिल्ने अपेक्षा गरिएको छ ।
किर्डाक नेपाल हुम्लाका संयोजक जनक बुढाका अनुसार संस्थाले विगतदेखि नै विद्यार्थीको गुणस्तरीय पठनपाठन तथा शैक्षिक विकासका लागि विभिन्न सहयोगात्मक कार्यक्रम सञ्चालन गर्दै आएको बताउनुभयो ।