बिदाको दिनमा पनि हुम्लाको सामाजिक विकास कार्यालयद्वारा सेवा प्रवाह

सिमकोट, हुम्ला ।

हुम्लाको सामाजिक विकास कार्यालयले असार मसान्तको चापलाई मध्यनजर गर्दै सार्वजनिक बिदा तथा अन्य बिदाका दिनमा समेत सेवा प्रवाह गर्ने व्यवस्था गरेको छ । कार्यालय प्रमुख ईश्वरबहादुर सिंहका अनुसार जिल्लाका दुर्गम क्षेत्रबाट सदरमुकाम सिमकोट आउने सेवाग्राहीलाई अनावश्यक आर्थिक भार नपरोस् भन्ने उद्देश्यले बिदाका दिनमा पनि कार्यालय सञ्चालन गरिएको हो। उहाँले बिदाको दिनमा सेवा नपाउँदा सेवाग्राही होटलमा बस्न बाध्य हुने र अतिरिक्त खर्च व्यहोर्नुपर्ने अवस्था रहेकाले यस्तो निर्णय गरिएको बताउनुभयो । 

कार्यालयले विशेषगरी जिल्लाका टाढाका नाम्खा, सर्केगाड, चंखेली, अदानचुली र ताँजाकोट गाउँपालिकाबाट  आउने सेवाग्राहीलाई लक्षित गरी आजदेखि सार्वजनिक बिदाको दिनमा समेत सेवा दिन थालेको जनाएको छ । प्रमुख सिंहका अनुसार नजिकका पालिकाभन्दा टाढाका क्षेत्रबाट आउने सेवाग्राहीलाई प्राथमिकतामा राखी सेवा प्रवाह गरिनेछ। सेवाग्राहीलाई कुनै किसिमको सास्ती नहोस् भन्ने उद्देश्यले आवश्यक व्यवस्थापन मिलाइएको उहाँले जानकारी दिनुभयोे ।

कार्यालयले चालु आर्थिक वर्षको प्रगति तथा पुँजीगत खर्चको लक्ष्य पूरा गर्नुपर्ने भएकाले असार १० गतेसम्म उपभोक्ता समिति, स्वास्थ्य व्यवस्थापन समितिका पदाधिकारी तथा अन्य सेवाग्राहीलाई भुक्तानीलगायतका सेवा उपलब्ध गराउने जनाएको छ । 
सामाजिक विकास कार्यालयको यस निर्णयबाट जिल्लाका दुर्गम क्षेत्रका सेवाग्राही लाभान्वित हुने भएको छन । पछिल्लो समयमा यो कार्यालयले उल्लेखनीय काम गर्दै आएको छ ।