मानसरोवरमा मृत्यु भएका भारतीय नागरिक जैनको लाश भारत लगिने 

सिमकोट । मानसरोवर कैलासको दर्शन गर्न गएका भारतीय तिर्थालु आदी कुमार नेम कुमार जैनको लास हिल्सा नाका हुँदै स्थलमार्गबाट मृतकको घर लगिएको छ । 

रसुवाको केरुङ नाका हुदैं चीनको स्वशाशीत क्षेत्र तिब्बतमा रहेको धार्मिक तिर्थस्थल कैलास मानसरोवर गएका जैनको बिहिबार ज्यान गएको थियो । 

केरुङ नाकाबाट आएको र सोही नाकाबाट जाने अनुमती भएपनि यात्राका क्रममा जैनको मृत्यु भएपछि उनको लासलाई भारत लिन हिल्सा नाका भएर सहज हुने भएपछि हिल्सा भन्सारबाट कागजात मिलाएर आज बिहान गाडीमा सिमकोट हुँदै नेपालगञ्जतर्फ लगिएको जिल्ला प्रशासन कार्यालयले जनाएको छ ।

शुक्रबार रातीसम्म मृतक जैनको लाशलाई हेलिकोप्टरमार्फत ल्याउने कुरा भएपनि शनिबार आज भन्सारमा कागजात मिलाएर लाश नेपालतर्फ निकास गरे लगत्तै गाडीमा नेपालगञ्जतर्फ लगिएको हो । नेपालगञ्ज हुदैं उक्त लाश भारत स्थित जैनको घर पुर्याइने छ । 

केरुङ नाकाबाट कैलास मानसरोवरसम्मको लामो दूरीको यात्रा पछि लेक लागेर मृत्यु भएका जैनको लाशलाई सुक्रबार चीनको ताक्लाकोट स्थित अस्पतालमा आइस भित्र राखिएको थियो ।

हिन्दु धर्मालम्बी र बौद्ध धर्मालम्बीहरुको ठूलो तिर्थका रुपमा चनिने कैलास मानसरोको दर्शनका लागि अहिले भारतीय तिर्थालुहरु ठूलो संख्यामा हुम्लाको हिल्सा र रसुवाको केरुङ नाकाबाट जाने गरेका छन् ।