नेपाल बिमा प्राधिकरणद्वारा सञ्चारकर्मीसँग बिमा सम्बन्धी छलफल तथा अन्तरक्रिया

सिमकोट ।  नेपाल बिमा प्राधिकरणले जिल्लाका सञ्चारकर्मीसँग बिमा सम्बन्धी छलफल तथा अन्तरक्रिया कार्यक्रम सञ्चालन गरेको छ । बिमा सम्बन्धी जनचेतना अभिवृद्धि गर्ने उद्देश्यले नेपाल बिमा प्राधिकरण कर्णाली प्रदेश कार्यालयको आयोजनामा सदरमुकाम सिमकोटस्थित मानसरोवर होटलमा कार्यक्रम गरिएको हो ।

कार्यक्रमको अध्यक्षता नेपाल बिमा प्राधिकरण कर्णाली प्रदेशका सहायक निर्देशक विपना पन्थीले गर्नुभएको थियो । कार्यक्रममा बिमाको परिचय, बिमाको आवश्यकता, बिमाका प्रमुख काम तथा विभिन्न प्रकारका बिमाका विषयमा जानकारी गराइएको थियो ।

कार्यक्रममा सहभागी सञ्चारकर्मीहरुले जिल्लामा बिमा सम्बन्धी काम गर्ने केही अभिकर्ताहरुले सर्वसाधारण नागरिकलाई पर्याप्त जानकारी नदिई भ्रममा पारेर बिमा गराउने गरेको गुनासो गरेका थिए । बिमा गर्दा त्यसको उद्देश्य, प्रक्रिया, फाइदा तथा जोखिमका विषयमा नागरिकलाई स्पष्ट जानकारी दिनुपर्नेमा सञ्चारकर्मीहरुले जोड दिएका थिए ।

बिमा गरिसकेपछि सेवाग्राहीले सहज रुपमा सेवा पाउने वातावरण बनाउनुपर्ने, बिमितले जम्मा गरेको रकमको सुरक्षामा विशेष ध्यान दिनुपर्ने तथा बिमा कम्पनी र अभिकर्ताहरुले जिम्मेवार भएर काम गर्नुपर्ने सुझाव समेत दिइएको थियो ।

हुम्लामा पछिल्लो समय बिमा गर्ने नागरिकको संख्या बढ्दै गए पनि बिमासम्बन्धी पर्याप्त जानकारीको अभाव रहेको बताइएको छ । कतिपय अवस्थामा बिमितले बुझ्नुपर्ने विषय नबुझी बिमा गर्ने र पछि समस्या आउने गरेको सहभागीहरुले बताएका थिए । सञ्चारकर्मीहरुले जिल्लामा सञ्चालन भइरहेका सबै प्रकारका बिमा सेवाप्रति नागरिकलाई सचेत गराउन आवश्यक रहेको बताएका छन् ।

कार्यक्रममा नेपाल बिमा प्राधिकरण कर्णाली प्रदेशका सहायक निर्देशक विपना पन्थीले चालु आर्थिक वर्षदेखि एक स्थानीय तहमा एक बिमा शाखा स्थापना गर्ने योजना रहेको जानकारी दिनुभयो । स्थानीय तहसम्म बिमा सेवा विस्तार गर्ने र नागरिकलाई सहज रुपमा बिमासम्बन्धी सेवा उपलब्ध गराउने उद्देश्यले यस्तो व्यवस्था गर्न लागिएको उहाँले बताउनुभयो ।

उहाँले बिमा क्षेत्रलाई व्यवस्थित, पारदर्शी र प्रभावकारी बनाउन प्राधिकरणले विभिन्न कार्यक्रम गर्दै आएको बताउनुभयो । नागरिकले बिमा गर्दा सही जानकारी लिएर मात्र बिमा गर्नुपर्ने र बिमा कम्पनी तथा अभिकर्ताहरुले पनि सेवाग्राहीको विश्वास कायम राख्ने गरी काम गर्नुपर्ने उहाँको भनाइ थियो ।

हुम्लामा बिमितहरुले जम्मा गरेको रकमको व्यवस्थापन तथा सेवाप्रवाहका विषयमा केही गुनासा आउने गरेको भन्दै सञ्चारकर्मीहरुले यसतर्फ सम्बन्धित बिमा संस्थाहरुले विशेष ध्यान दिनुपर्ने बताएका छन् । बिमा क्षेत्रप्रति नागरिकको विश्वास कायम राख्न पारदर्शी सेवा आवश्यक रहेको उनीहरुको भनाइ थियो ।

नेपाल बिमा प्राधिकरणले हुम्लाका विभिन्न स्थानीय तहमा बिमा सम्बन्धी जनचेतना तथा अन्तरक्रिया कार्यक्रम गर्दै आएको छ । जिल्लाका चार वटा स्थानीय तहमा यस्तो कार्यक्रम सञ्चालन गरिने जनाइएको छ । कार्यक्रमले बिमा सम्बन्धी जानकारी अभिवृद्धि गर्नुका साथै सञ्चार माध्यममार्फत नागरिकलाई सही सूचना प्रवाह गर्न सहयोग पुग्ने अपेक्षा गरिएको छ ।