खार्पुनाथमा पालिका स्तरीय शैक्षिक कार्यशाला गोष्ठी सम्पन्न

सिमकोट, हुम्ला । 

हुम्लाको खार्पुनाथ गाउँपालिकामा पालिका स्तरीय शैक्षिक कार्यशाला गोष्ठी सम्पन्न भएको छ । खार्पुनाथ गाउँपालिकाका अध्यक्ष कर्ण रावलको अध्यक्षतामा सञ्चालन भएको कार्यक्रममा शिक्षण सिकाइ सुधार, गुणस्तरीय शिक्षा अभिवृद्धि, विद्यालय छोड्ने दर घटाउने, विद्यार्थीको उपस्थिति दर बढाउने, शैक्षिक तथ्यांकलाई व्यवस्थित बनाउने तथा अनुगमन प्रणालीमा सुधार गर्ने विषयमा समूहगत छलफल गरिएको छ ।

कार्यक्रममा खार्पुनाथ गाउँपालिकाका उपाध्यक्ष ज्ञान बहादुर सिंह, वडा नम्बर १ देखि ५ सम्मका वडा अध्यक्षहरू, गाउँपालिकाका पाँच वटा माध्यमिक विद्यालयका प्रधानाध्यापकहरू, बाल क्लबका प्रतिनिधि, विद्यालय व्यवस्थापन समिति अध्यक्षहरू, शिक्षक संघका अध्यक्षहरू तथा गाउँपालिकाका सम्पूर्ण शाखा प्रमुखहरूको सहभागिता रहेको थियो ।

कार्यशालामा शैक्षिक क्षेत्रका समस्या, चुनौती र सुधारका उपायबारे छलफल गर्दै आगामी दिनमा विद्यालयको शैक्षिक गुणस्तर सुधारका लागि आवश्यक योजना निर्माणमा जोड दिइएको छ । किर्डाक नेपालका कार्यक्रम संयोजक जनक बुढा, गुडनेवर्स इन्टरनेसनलका कार्यक्रम अधिकृत गोविन्द चौधरी, वित्त तथा प्रशासन अधिकृत प्रेम बहादुर बुढा, सहजकर्ता नवराज महतारा तथा नेपाल पत्रकार महासंघ हुम्लाका उपाध्यक्ष छपाल लामा लगायतको सहभागिता रहेको थियो । किर्डाक नेपालको आयोजना, गुडनेवर्स इन्टरनेसनलको आर्थिक सहयोग र खार्पुनाथ गाउँपालिकाको समन्वयमा कार्यक्रम सञ्चालन गरिएको हो ।