गर्भवती महिलाको नेपाली सेनाको हेलिकप्टरबाट थप उपचारका लागि जिल्ला बाहिर उद्धार

सिमकोट, हुम्ला । 

गर्भवती महिलाको नेपाली सेनाको हेलिकप्टरबाट जिल्ला बाहिर उद्धार गरिएको छ । हुम्लाको नाम्खा गाउँपालिका–१ हेक्का निवासी २८ वर्षीया सरिता लामाको नेपाली सेनाको हेलिकप्टरमार्फत उद्धार गरिएको छ । सुत्केरी व्यथा लागेपछि जिल्ला अस्पताल हुम्लामा ल्याइएकी लामाको अवस्था जटिल भएपछि थप उपचारका लागि सुर्खेत पठाइएको हो ।

आज बिहान ८ बजेर ११ मिनेटमा नेपाली सेनाको ऐन ए ०५५ नम्बरको हेलिकप्टरबाट लामालाई उद्धार गरिएको छ । राष्टपती महिला उत्थान, जिल्ला स्वास्थ्य सेवा कार्यालय र जिल्ला प्रसासन कार्यालयको पहलमा लामाको उद्धार गरिएको हो । 

 लामा असार ७ गते बिहानदेखि सुत्केरी व्यथाले थलिएकी थिइन् । उनलाई सोही दिन बेलुका जिल्ला अस्पताल हुम्ला ल्याई स्वास्थ्य परीक्षण गर्दा जिल्ला अस्पतालमा सुत्केरी गराउन सम्भव नभएपछि जिल्ला प्रशासन कार्यालय हुम्लाको सिफारिसमा प्रदेश अस्पताल सुर्खेत पठाइएको हो । उद्धारका क्रममा लामासँग उनका दिदी नाता पर्ने कुसुम ऐडी र मनुका ऐडी पनि गएका छन् ।

स्वास्थ्य सेवा कार्यालय हुम्लाका प्रमुख उमाकान्त तिवारीका अनुसार लामाको रक्तचाप अत्यधिक बढेर १७०÷१२० पुगेको थियो । उपचारका क्रममा उनी बेहोस भएको र पाँच पटकसम्म झड्का आएको उहाँले बताउनुभयो ।

डा. तिवारीका अनुसार लामाको गर्भमा रहेको बच्चा ३१ हप्ताको मात्रै रहेको छ । भिडियो एक्सरे जाँच गर्दा बच्चाको तौल करिब १२ सय ग्राम मात्रै देखिएको छ । समय नपुगेको र बच्चाको तौल कम भएकाले थप विशेषज्ञ उपचारको आवश्यक रहेको डा तिवारीले बताउनु भयो ।