नाम्खाले ल्यायो ३५ करोड ३२ लाख १५ हजार ८८८ रुपैयाँ २० पैसा बराबरको बजेट

हुम्ला । 
हुम्लाको नाम्खा गाउँपालिकाले आर्थिक वर्ष २०८३÷०८४ का लागि ३५ करोड ३२ लाख १५ हजार ८ सय ८८ रुपैयाँ २० पैसा बराबरको बजेट सार्वजनिक गरेको छ। कृषि उत्पादन वृद्धि, सडक तथा पूर्वाधार विकास, शिक्षा, स्वास्थ्य, खानेपानी, विपद् व्यवस्थापन र स्थानीय सेवा प्रवाहलाई केन्द्रमा राख्दै गाउँपालिकाले आगामी वर्षका लागि महत्वाकांक्षी योजना अघि सारेको हो।

१५औं गाउँसभाबाट गाउँपालिकाका उपाध्यक्ष तक्दिर लामले प्रस्तुत गरेको कुल बजेटमध्ये रु. २१ करोड ५० लाख ७७ हजार चालुतर्फ तथा रु. १३ करोड ८१ लाख ३८ हजार ८८८ रुपैयाँ २० पैसा पुँजीगततर्फ विनियोजन गरिएको छ। संघीय सरकार, प्रदेश सरकार र गाउँपालिकाको आन्तरिक स्रोतबाट प्राप्त हुने रकमलाई समेटेर बजेट निर्माण गरिएको हो।

गाउँपालिकाले कृषि तथा पशुपालन क्षेत्रलाई उत्पादनमुखी बनाउने उद्देश्यले कृषक सहायता, कृषि सामग्री वितरण, पशु सेवा विस्तार तथा कृषि आधुनिकीकरणका कार्यक्रमलाई प्राथमिकता दिएको छ। त्यस्तै सडक स्तरोन्नति, विद्युत् पूर्वाधार विस्तार, झुलापुल निर्माण, खानेपानी तथा सिँचाइ योजनामा पनि उल्लेख्य बजेट छुट्याइएको छ।