असार मसान्तसम्म २ हजार क्विन्टल खाद्यान्नमा सहुलियत, पहिलो दिनमै २९३ क्विन्टल बिक्री ।।

सिमकोट, हुम्ला । 

नेपाल खाद्य व्यवस्था तथा व्यापार कम्पनी लिमिटेड शाखा कार्यालय हुम्लाले असार मसान्तसम्मका लागि २ हजार क्विन्टल खाद्यान्न सहुलियत मूल्यमा बिक्री–वितरण सुरु गरेको छ । कार्यालयले स्टिम जिरा मसिनो चामल प्रतिक्विन्टल १ हजार ८५० रुपैयाँ, अरुवा सोना मन्सुली चामल १ हजार २५० रुपैयाँ तथा अरुवा मोटा चामल १ हजार १५० रुपैयाँमा बिक्री गरिरहेको जनाएको छ ।  सहुलियत अन्तर्गत प्रतिकेजी १० रुपैयाँ अर्थात् प्रतिक्विन्टल १ हजार रुपैयाँ छुट प्रदान गरिएको छ ।

यो सहुलियत असार मसान्तसम्म वा २ हजार क्विन्टल खाद्यान्नको कोटा सकिनु अघि सम्म लागू रहने शाखाका प्रमुख कृष्ण थापा मगरले बताउनु भयो । सहुलियत बिक्रीको पहिलो दिन कार्यालयबाट १९ लाख ७२ हजार ३५० रुपैयाँ बराबरको कारोबार भएको छ । सो अवधिमा जम्मा २९३ क्विन्टल चामल बिक्री भएको शाखा कार्यालय प्रमुख कृष्ण थापा मगरले जानकारी दिनुभयो । सहुलियत मूल्यमा खाद्यान्न उपलब्ध भएपछि जिल्लाका उपभोक्ताले राहत महसुस गरेका छन् भने कार्यालयले समयमै खाद्यान्न खरिद गर्न सेवाग्राहीलाई आग्रह गरेको छ ।