भौतिक तथा पूर्वाधार मन्त्रीद्वारा कर्णाली करिडोर र कर्णाली राजमार्गको स्थलगत अवलोकन

हुम्ला । 
भौतिक तथा पूर्वाधार मन्त्री सुनिल लम्सालले कर्णाली करिडोर तथा कर्णाली राजमार्गको स्थलगत अवलोकन गर्दै सडक पूर्वाधारको सुधारलाई सरकारले उच्च प्राथमिकतामा राखेको बताउनुभएको छ । कर्णाली प्रदेशका दुर्गम जिल्लाहरूको सडक पहुँचलाई सहज बनाउन चालु योजनाअन्तर्गत करिडोर तथा राजमार्गका लागि ७ अर्ब रुपैयाँ बजेट विनियोजन गरिएको जानकारी उहाँले दिनुभयो ।

मन्त्री लम्सालले उक्त बजेट सडकको स्तरोन्नति, यातायातलाई सुरक्षित र सहज बनाउने तथा वर्षभर सञ्चालनयोग्य सडक निर्माणका लागि पर्याप्त हुने विश्वास व्यक्त गर्नुभयो । उहाँका अनुसार आगामी केही हप्ताभित्रै अदानचुली गाउँपालिका र ताँजाकोट गाउँपालिका अन्तर्गत पर्ने कर्णाली राजमार्गमा ग्राभेल भर्ने, सडकको चौडाइ बढाई डबल लेन बनाउने कार्यका लागि टेण्डर आह्वान गरिनेछ । उहाँले हुम्लासम्मको सडक सञ्जाललाई थप व्यवस्थित बनाउने सरकारको योजना रहेको उल्लेख गर्दै आगामी तीन महिनाभित्र हिल्सादेखि सिमकोटसम्मको सडक कालोपत्रे गर्ने प्रक्रिया अघि बढाइने बताउनुभयो । साथै, उत्तरी व्यापारिक नाका हिल्सा पूर्ण रूपमा सञ्चालनमा ल्याउन चीन सरकार तथा चिनियाँ दूतावाससँग आवश्यक सम्झौता गरी व्यापारिक गतिविधि सहज बनाउने प्रतिबद्धता पनि मन्त्री लम्सालले जनाउनुभयो ।

मन्त्री लम्सालसँग संघीय सांसद रमेश कुमार सापकोटा, सुसान वैदिक, राष्ट्रिय स्वतन्त्र पार्टी (रास्वपा) कर्णाली प्रदेशका केन्द्रीय सदस्य टासी लामा, सडक विभागका सचिव तथा विभागीय निर्देशकसहितको टोली पनि हुम्ला पुगेको थियो । टोलीले सडकको अवस्था, निर्माणको प्रगति, समस्या तथा आगामी योजनाबारे स्थलगत अध्ययन गरेको जनाएको छ । 

भौतिक तथा पूर्वाधार मन्त्रीको टोलीले सुर्खेतबाट यात्रा सुरु गरी कर्णाली प्रदेशका कालिकोट, जुम्ला, मुगु हुँदै हुम्ला पुगेर राजमार्ग तथा करिडोरको अवलोकन गरेको हो । मन्त्री लम्साल हिजो राति करिब १ बजे सिमकोट पुग्नुभएको थियो भने आज निरीक्षण कार्यक्रम सम्पन्न गरी फर्किनुभएको छ ।