वन्यजन्तुले केबुलमा क्षति पुर्याउँदा गुसा लेकको रिपिटर टावर तीन दिनदेखि अवरुद्ध

सिमकोट,   सर्केगाड गाउँपालिका–३ स्थित गुसा लेकमा रहेको नेपाल टेलिकमको रिपिटर टावरमा प्राविधिक समस्या देखिएपछि स्थानीय बासिन्दा सञ्चार सेवाबाट वञ्चित भएका छन् । टावर तीन दिनदेखि अवरुद्ध हुँदा मोबाइल तथा सञ्चार सेवामा समस्या उत्पन्न भएको स्थानीयले बताएका छन् ।

नेपाल टेलिकमका प्राविधिक ओवजन शाही समस्या समाधानका लागि टावर रहेको स्थानमा पुगेर प्राविधिक परीक्षण गर्दा वन्यजन्तुले तारमा क्षति पु¥याएको पाइएको बताउनु भयो ।  टावर परिसरमा उचित घेराबार नभएका कारण वन्यजन्तु सहजै पुगेर केबुलमा क्षति पु¥याएको प्राविधिक शाहीले जानकारी दिनुभयो । 

उहाँका अनुसार टावरमा जडान गरिएका तीनवटा सीपीआरआई केबुल पूर्ण रूपमा नष्ट भएका छन् । आवश्यक नयाँ केबुल सुर्खेतबाट ल्याउनुपर्ने भएकाले ती सामग्री नपुग्दासम्म सेवा पुनः सञ्चालन गर्न सम्भव नहुने उहाँले बताउनुभयो । हाल केबुल ल्याउने प्रक्रिया अघि बढाइएको र करिब एक साताभित्र आवश्यक सामग्री गुसा लेक पुग्ने अनुमान गरिएको छ । 

स्थानीयवासी छक्क फडेराले टावर बिग्रिएको तीन दिन भइसकेको जानकारी दिँदै सञ्चार सेवा अवरुद्ध हुँदा दैनिक जनजीवन प्रभावित भएको बताउनुभयो ।  मोबाइल फोन, इन्टरनेट तथा आपत्कालीन सम्पर्कमा समेत समस्या उत्पन्न भएको उहाँको भनाइ छ । गुसा लेकको उक्त रिपिटर टावर सर्केगाड क्षेत्रका विभिन्न बस्तीमा नेपाल टेलिकमको मोबाइल सेवा प्रवाह गर्ने महत्वपूर्ण संरचना हो। टावर सञ्चालनमा नहुँदा स्थानीयले आफन्तसँग सम्पर्क गर्न, सरकारी तथा निजी कामकाज गर्न र सूचना आदानप्रदान गर्न कठिनाइ भोगिरहेका छन् ।