डाँडाफया स्वास्थ्य चौकीको आर्थिक वर्ष २०८२÷०८३ को सार्वजनिक सुनुवाइ सम्पन्न

सिमकोट,   डाँडाफया स्वास्थ्य चौकीले आर्थिक वर्ष २०८२÷०८३ को सार्वजनिक सुनुवाइ कार्यक्रम सम्पन्न गरेको छ । स्वास्थ्य संस्थाले एक वर्षको अवधिमा प्रदान गरेका स्वास्थ्य सेवा, सञ्चालन भएका कार्यक्रम, उपलब्धि तथा आगामी योजनाबारे जानकारी गराउने उद्देश्यले सार्वजनिक सुनुवाइ आयोजना गरिएको हो ।

कार्यक्रममा स्थानीय जनप्रतिनिधि, सरोकारवाला निकाय, स्वास्थ्यकर्मी, महिला स्वास्थ्य स्वयंसेविका, सेवाग्राही तथा स्थानीयवासीको सहभागिता रहेको थियो । सहभागीहरूले स्वास्थ्य सेवाको गुणस्तर, सेवा प्रवाह, औषधि उपलब्धता, मातृ तथा शिशु स्वास्थ्य लगायत विभिन्न विषयमा सुझाव, जिज्ञासा र गुनासा राखेका थिए । स्वास्थ्य चौकीका प्रतिनिधिहरूले उठाइएका प्रश्नको जवाफ दिँदै प्राप्त सुझावलाई आगामी योजना तथा सेवा सुधारमा समावेश गर्ने स्वास्थ्य चौकीका इन्चार्ज सन्तोष बोहराले प्रतिबद्धता जनाउनु भएको छ । 

डाँडाफया स्वास्थ्य चौकीले कार्यक्रममा उपस्थित भई सार्वजनिक सुनुवाइ सफल बनाउन सहयोग गर्ने सम्पूर्ण जनप्रतिनिधि, सरोकारवाला निकाय, सञ्चारकर्मी, स्वास्थ्य स्वयंसेविका तथा स्थानीयवासीप्रति हार्दिक आभार व्यक्त गरेको छ । व्यस्त समयका बाबजुद कार्यक्रममा सहभागी भई रचनात्मक सुझाव र सल्लाह प्रदान गर्ने सबैप्रति धन्यवाद ज्ञापन गरिएको छ ।

स्वास्थ्य चौकीले सार्वजनिक सुनुवाइका क्रममा प्राप्त सुझाव र गुनासालाई आत्मसात गर्दै आगामी आर्थिक वर्षहरूमा स्वास्थ्य सेवा प्रवाहलाई अझ विश्वसनीय, गुणस्तरीय, पारदर्शी र नागरिकमैत्री बनाउने प्रतिबद्धता व्यक्त गरेको छ । साथै सुशासन, जवाफदेहिता र सेवाग्राहीमैत्री कार्यशैलीलाई प्राथमिकतामा राख्दै स्थानीय नागरिकलाई प्रभावकारी स्वास्थ्य सेवा उपलब्ध गराउने लक्ष्यका साथ कार्य अघि बढाइने जनाएको छ । सार्वजनिक सुनुवाईमा ५३ जना नागरिकको उपस्थित रहेको थियो ।