सामाजिक विकास कार्यालय हुम्ला वित्तीय र भौतिक प्रगतिमा कर्णाली प्रदेश कै पहिलो

सिमकोट ।   आर्थिक वर्ष २०८२÷८३ को चालूतर्फका योजना कार्यान्वयन, खर्च प्रगति तथा भौतिक प्रगतिमा सामाजिक विकास कार्यालय हुम्ला कर्णाली प्रदेश कै पहिलो भएको छ । कर्णाली प्रदेश सरकार अन्तर्गतका कार्यालयहरूको वार्षिक समीक्षाको क्रममा गरिएको मूल्यांकनमा सामाजिक विकास कार्यालय हुम्लाले समग्र वित्तीय तथा भौतिक प्रगतितर्फ उत्कृष्ट नतिजा हासिल गर्दै प्रथम स्थान प्राप्त गरेको छ। कार्यालय प्रमुख ईश्वरबहादुर सिंहले कार्यालयले आर्थिक वर्षभरि सञ्चालन गरेका योजना तथा कार्यक्रमको प्रभावकारी कार्यान्वयनका कारण हुम्ला प्रथम हुन सफल भएको जानकारी दिनुभयो ।

कर्णाली प्रदेशस्तरीय वार्षिक समीक्षामा समग्र वित्तीय तथा भौतिक प्रगतिका आधारमा सामाजिक विकास कार्यालय हुम्ला पहिलो र सामाजिक विकास कार्यालय कालिकोट दोस्रो भएको छ । कार्यालयले स्वीकृत योजना तथा कार्यक्रमलाई समयमै कार्यान्वयन गर्ने, बजेटको प्रभावकारी उपयोग गर्ने तथा लक्षित कार्यक्रमलाई प्राथमिकताका साथ अघि बढाएको जनाएको छ । दुर्गम हिमाली जिल्ला हुम्लामा भौगोलिक विकटता, यातायातको असहजता र मौसमजन्य समस्याका बीच पनि कार्यालयले योजनाको कार्यान्वयनमा देखाएको सक्रियता र व्यवस्थापनले राम्रो प्रगति हासिल गर्न सहयोग पुगेको बताइएको छ ।

कार्यालय प्रमुख सिंहका अनुसार कार्यालयको प्रगति कर्मचारीको मेहनत, योजना कार्यान्वयनमा सम्बन्धित निकायसँगको समन्वय तथा सेवाग्राही र सरोकारवालाको सहयोगको परिणाम भएको बताउनु भयो । आगामी दिनमा पनि स्वीकृत कार्यक्रमलाई प्रभावकारी रूपमा कार्यान्वयन गर्दै सामाजिक विकाससँग सम्बन्धित सेवा तथा पूर्वाधारलाई थप व्यवस्थित बनाउने कार्यालयको लक्ष्य रहेको उहाँले बताउनुभयो । कर्णाली प्रदेशस्तरीय समीक्षामा हुम्लाले प्रथम स्थान हासिल गरेपछि जिल्लाका सामाजिक विकाससँग सम्बन्धित कार्यक्रमको कार्यान्वयन क्षमता र कार्यालयको व्यवस्थापन पक्षलाई समेत सकारात्मक रूपमा हेरिएको छ ।