खाद्य व्यवस्था तथा व्यापार कम्पनी लिमिटेड हुम्लाद्वारा सहुलियत मूल्यमा खाद्यान्न बिक्री गरिने

सिमकोट ।    हुम्लाको सदरमुकाम सिमकोटमा रहेको खाद्य व्यवस्था तथा व्यापार कम्पनी लिमिटेडले भदौ १ गतेदेखि सहुलियत मूल्यमा खाद्यान्न बिक्री वितरण गर्ने भएको छ । कम्पनीले चामल सहित विभिन्न खाद्य सामग्रीमा प्रतिकेजी ५ रुपैयाँसम्म छुट दिने भएको हो । खाद्य व्यवस्था तथा व्यापार कम्पनी लिमिटेड हुम्ला शाखाका प्रमुख कृष्ण बहादुर थापा मगरका अनुसार करिब ४० लाख ३६ हजार रुपैयाँ बराबरको चामल सहुलियत मूल्यमा बिक्री गरिनेछ । मौज्दात चामल नसकिएसम्म सहुलियत मूल्यमा बिक्री वितरण जारी रहने उहाँले जानकारी दिनुभयो । 

सहुलियत मूल्यअ नुसार अरुवा मोटा चामल २५ किलोको १ हजार ४ सय रुपैयाँ अर्थात् प्रतिकिलो ५६ रुपैयाँ, अरुवा मन्सुली चामल २५ किलोको १ हजार ४ सय २५ रुपैयाँ अर्थात् प्रतिकिलो ५७ रुपैयाँ र अरुवा मध्यम चामल २५ किलोको १ हजार ४ सय ५० रुपैयाँ अर्थात् प्रतिकिलो ५८ रुपैयाँमा बिक्री गरिनेछ । त्यसैगरी स्टिम जिरा मसिनो चामल २५ किलोको २ हजार १ सय ७५ रुपैयाँ अर्थात् प्रतिकिलो ८७ रुपैयाँमा उपलब्ध गराइने शाखाले जनाएको छ । यसैगरी सूर्यमुखी तेलको एक पेटी अर्थात् १० लिटर र चिनी एक बोरा अर्थात् ५० किलोमा समेत सहुलियत उपलब्ध गराइनेछ ।

खाद्य व्यवस्था तथा व्यापार कम्पनी लिमिटेड प्रधान कार्यालयको बिक्री वितरण विभागबाट प्राप्त पत्र अनुसार कम्पनीको सातौँ वार्षिक उत्सव तथा चाडपर्वलाई लक्षित गर्दै सहुलियत मूल्यको व्यवस्था गरिएको हो । शाखा प्रमुख थापा मगरका अनुसार यो सहुलियत वर्षभरि लागू हुने गरी व्यवस्था गरिएको छ । चाडपर्व नजिकिँदै गर्दा खाद्यान्नमा सहुलियत दिइएपछि हुम्लाका उपभोक्तालाई केही राहत पुग्ने भएको छ । कम्पनीले तोकेको सहुलियत मूल्य अनुसार उपभोक्ताले खाद्यान्न खरिद गर्न सक्ने जनाइएको छ ।