स्याडा स्वास्थ्य चौकीमा प्रसूति प्रतीक्षालय, प्रयोगशाला र शौचालय भवन उद्घाटन

सिमकोट ।   हुम्लाको सिमकोट गाउँपालिका वडा आठमा रहेको स्याडा स्वास्थ्य चौकीमा प्रसूति प्रतीक्षालय, प्रयोगशाला (ल्याब) तथा शौचालय भवन हस्तान्तरण तथा उद्घाटन कार्यक्रम सम्पन्न भएको छ। स्वास्थ्य चौकीमा आउने गर्भवती महिला, सुत्केरी आमा तथा अन्य सेवाग्राहीलाई सहज, सुरक्षित र व्यवस्थित रूपमा स्वास्थ्य सेवा उपलब्ध गराउने उद्देश्यले निर्माण गरिएका संरचना हस्तान्तरण गरिएको हो । नवनिर्मित प्रसूति प्रतीक्षालय, प्रयोगशाला र शौचालय भवन निर्माणमा आधार विकास नेपालले सहयोग गरेको हो। स्वास्थ्य चौकी परिवारले महत्वपूर्ण पूर्वाधार निर्माणमा सहयोग पु¥याएको भन्दै आधार विकास नेपालप्रति धन्यवाद तथा आभार व्यक्त गरेको स्वास्थ्य चौकीका इन्चार्ज नर भण्डारीले बताउनु भयो ।

यसअघि स्वास्थ्य संस्थामा सेवा लिन आउने गर्भवती महिला तथा अन्य सेवाग्राहीले आवश्यक पूर्वाधारको अभावमा विभिन्न कठिनाइ भोग्नुपर्ने अवस्था रहेको थियो। नयाँ संरचना निर्माण भएसँगै प्रसूति सेवा लिन आउने महिलालाई प्रतीक्षालयको सुविधा, आवश्यक स्वास्थ्य परीक्षणका लागि प्रयोगशाला तथा सेवाग्राहीका लागि व्यवस्थित शौचालयको सुविधा उपलब्ध भएको छ । स्वास्थ्य चौकीका अनुसार यी संरचनाले स्वास्थ्य सेवा प्रवाहलाई थप व्यवस्थित, सुरक्षित, सहज र गुणस्तरीय बनाउन सहयोग पुग्ने अपेक्षा गरिएको छ। विशेषगरी गर्भवती तथा सुत्केरी महिलालाई स्वास्थ्य संस्थामै सुरक्षित वातावरणमा सेवा लिन सहज हुने विश्वास गरिएको छ । स्वास्थ्य क्षेत्रमा आवश्यक भौतिक पूर्वाधार थपिँदा स्वास्थ्य चौकीबाट प्रदान गरिने सेवाप्रति स्थानीय नागरिकको विश्वाससमेत बढ्ने अपेक्षा गरिएको छ। स्थानीयस्तरमै गुणस्तरीय स्वास्थ्य सेवा उपलब्ध गराउन यस्ता सहयोग र सहकार्यलाई निरन्तरता दिनुपर्नेमा समेत जोड दिइएको छ ।