हुम्लाको सर्केगाड बजार व्यापारिक मार्ग बन्दै 

हुम्ला । राष्ट्रिय सडक सञ्जालमा जोडिएसँगै सर्केगाड बजार व्यापारिक मार्ग बन्दै गएको छ । सर्केगाड गाउँपालिकाको नयाँ नयाँ स्थानमा बजार विस्तार हुनेक्रम बढेसँगै सर्केगाड बजार व्यापारिक केन्द्र बन्दै गएको हो ।

हाल चंखेली गाउँपालिका र सर्केगाड गाउँपालिकाको बिच भागमा पर्ने सलिसल्लामा बेलिब्रिजको काम सम्पन्न भएको छ । कर्णाली करिडोर अन्तर्गत यातायात सुचारु पनि भइरहेका छन् । गतवर्ष यता हुम्लाकै व्यापारिक मार्गका रुपमा विकास हुँदै गएको स्थानिय व्यापारीहरुले बताउँदै आएका छन ।

सर्केगाड बजारमा यतिबेला गाडीमोटर मात्रै नभई सबै किसिमका उपभोग्य सामानहरु गाउँ गाउँका बजारमा पुगेका छन । धमाधम विकास निर्माण भइरहेको सर्केगाडमा बजारीकरणको हब बन्दै गएको देख्न सकिने भएको छ ।

पहिले माटोले छोपेका घरहरु बनाइएका थिए भने अहिले जस्तापाता र सिमेन्टका घरहरु पनि बिस्तारै बनिरहेका छन । यस्तो विकासले सर्केगाडको मुहार फेरिदै गएको छ । सिमित व्यापारीमात्रै बसोबास गर्दै आएको सर्केगाडमा हाल बहुसंख्यक व्यापारीहरु ब्यापार गर्दै आएका छन । त्यस्तै स्थानिय उत्पादन सहरसम्म र सहरको सुविधा गाउँगाउँसम्म पुगेको महसुस सर्केगाडका जनताले गर्न पाइरहेका छन ।
सर्केगाडको नयाँ बजारमा हुम्ला, बाजुरा, मुगु लगायतका जिल्लाका व्यापारीले व्यवसाय गर्दै आएका छन् । हाल सर्केगाड खोला पारी गाउँपलिका केन्द्र भएसँगै नयाँ बजार विस्तार भएको छ । पहिले सुनसान रहेको क्षेत्रमा अहिले बजार गाउँपलिकाको कार्यालय स्थापना भएपछि व्यवस्थापन भएको स्थानीयको भनाइ रहेको छ ।

सर्केगाडमा यतिबेला करिब पाँच सय व्यापारिक पसलहरु रहेका छन । सर्केगाड बजारकै कारण स्थानीयले घर अगाडिकै बजारमा सबै किसिमका सामानहरु पाइरहेको स्थानिय झपेन्द्र साउदले बताउनु भएको छ । केही नियमन र नियन्त्रण गर्नुपर्ने भएतापनि सुविधा आगनमै पुगेको महसुस आफूहरुलाई भएको बताउनु भएको छ । अहिलेको रफ्तारमा सर्केगाड बजारीकर हुदै गए सुपथ मुल्यमा सबै किसिमका सामग्रीहरु किन्न पाइएला भन्ने आशा समेत पलाएको तबाउनु भएको छ ।