“चरन खर्क सुधार“ कार्यक्रम अन्तर्गत ४८ किसानलाई आवश्यक सामग्री वितरण

सिमकोट, हुम्ला । 

हुम्लाको सर्केगाड गाउँपालिकाले “चरन खर्क सुधार“ कार्यक्रम अन्तर्गत किसानलाई आवश्यक सामग्री वितरण गरेको छ । पशुपालन तथा चरन व्यवस्थापनलाई थप प्रभावकारी बनाउने उद्देश्यले गाउँपालिकाका १ देखि ८ वटै वडाका ४८ जना किसानलाई विभिन्न सामग्री उपलब्ध गराइएको छ ।

पशु सेवा शाखा प्रमुख छत्र शाहीका अनुसार कार्यक्रम मार्फत किसानलाई टर्च, रेनबुट, रेनकोट र त्रिपाल वितरण गरिएको छ । उच्च हिमाली क्षेत्रमा पशु चौपाया चराउन तथा खर्कमा बस्नुपर्ने अवस्थालाई मध्यनजर गर्दै यी सामग्री उपलब्ध गराइएको उहाँले बताउनुभयो । वर्षायाममा चरन क्षेत्रमा काम गर्दा किसानलाई हुने कठिनाइ कम गर्न तथा सुरक्षित रूपमा पशुपालन गर्न सहयोग पुग्ने भएकाले उक्त सामाग्री वितरण गरिएको शाखा प्रमुख शाहीले बताउनु भयो । 

सर्केगाड गाउँपालिकाले पशुपालनलाई स्थानीय आयआर्जनको महत्वपूर्ण आधारका रूपमा लिँदै विभिन्न कार्यक्रम सञ्चालन गर्दै आएको छ। चरन खर्क सुधार कार्यक्रम पनि त्यस अन्तर्गत सञ्चालन गरिएको बताइएको छ ।  वितरण गरिएका सामग्रीले किसानको दैनिक कार्यमा सहजता ल्याउनुका साथै पशुपालन व्यवसायलाई थप व्यवस्थित बनाउन सहयोग पुग्ने अपेक्षा गरिएको किसान मैता फडेराले बताउनु भयो । 

सामग्री प्राप्त गरेका किसानहरूले गाउँपालिकाले उपलब्ध गराएको सहयोगले चरन क्षेत्रमा काम गर्न निकै सहज हुने बताएका छन् । विशेषगरी वर्षायाममा रेनबुट, रेनकोट र त्रिपाल अत्यन्त उपयोगी हुने उनीहरूको भनाइ छ। उनीहरूले आगामी दिनमा पनि यस्ता किसानमुखी कार्यक्रमलाई निरन्तरता दिन गाउँपालिकासँग आग्रह गरेका अर्की किसान रिउली फडेराले बताउनु भयो । 
गाउँपालिकाले आगामी दिनमा पनि पशुपालन क्षेत्रको विकास, चरन व्यवस्थापन सुधार तथा किसानको जीवनस्तर उकास्ने उद्देश्यले यस्ता कार्यक्रमलाई निरन्तर सञ्चालन गर्ने भएको शाखा प्रमुख शाहीको भनाई रहेको छ ।