हुम्लामा उडान भर्ने जहाजमा यात्रु पाउन मुस्किल सिमकोटदेखि खाली उडान भर्दै

सिमकोट । यतिबेला नेपालगञ्ज, सुर्खेतबाट उडान भर्दै आएका निजी जहाजलाई यात्रु पाउन मुस्किल भएको छ । दुई हप्ता यतादेखि नेपालगञ्जबाट यात्रु लिएर गएका जहाजले सिमकोटबाट खाली उडान भर्नु पर्ने बाध्यता जस्तै बनेको छ । सिमकोटदेखि नेपालगञ्ज, काठमाण्डौँ लगायतका शहरमा झर्ने यात्रु कोही नहुँदा मुस्किलले दैनिक एक उडान गरेका जहाजले एक, दुई जना यात्रु बोकेर फिर्ता हुने गरेको सिमकोट विमानस्थलले जनाएको छ । नेपालगञ्जबाट नुन, कार्गो, यात्रु लगायत लिएर सिमकोट पुगेका सीता, तारा, समिटले फिर्ता हुँदा खाली भएर आउनु पर्ने अवस्था आएको छ ।

कुनै बेला सिमकोट विमानस्थलमा जिल्ला बाहिर झर्ने यात्रुको निकै चाप हुने भएपनि यो समय यात्रु खोज्न यि एयरलाइन्सका कर्मचारीले बजार धाउने गरेका छन् । सदरमुकाम सिमकोटदेखि गाडीले नेपालगञ्ज, सुर्खेतसम्म यात्रु ओसार्ने भएका कारण पनि जहाजलाई यात्रु पाउन मुस्किल हुँदै आएको छ । यो समय प्राय यात्रु जिल्ला बाहिर नझर्ने भएकाले पनि निजी जहाजलाई यात्रु पाउन मुस्किल भएको हो । साथै खार्पुसम्म सडक नजोडिदा विभिन्न निर्माण, दैनिक उपभोग्ये, खाद्यन्न, लगायतका सामग्री जहाजबाट ढुवानी हुने गरेपनि पछिल्लो समय ठुल्ठुला ट्क, गाडीले नेपालगञ्ज, सुर्खेतबाट सिधैँ ढुवानी गर्ने भएका कारण पनि जहाजको पछिल्लो समय महत्व घट्दै गएको छ ।

खार्पुनाथ देखि दक्षिण भेगका गाउँपालिकाका सबै जसो नागरीकलाई गाडी मार्फत पैदल आउने भएकाले पनि सिमकोटमा यतिबेला जिल्ला बाहिरिने यात्रुको चाप घटेको हुन सक्ने सिमकोट विमानस्थल स्रोतले जानकारी दिएको छ । पर्यटकको पनि सिजन नभएकाले पनि जहाजलाई यात्रु पाउन मुस्किल हुने गरेको छ । नेपालगञ्जमा भने यात्रुलाई सिमकोट पुग्न यतिबेला टिकट पाउन मुस्किल भएको छ ।

विभिन्न निजी एयरलाइन्सको कार्यालयमा धाउदा पनि सिमकोटका लागि टिकट नपाउने गरेको नेपालगञ्ज विमानस्थलमा भेटिएका यात्रुको गुनासो छ । साथै सीता, समिट र तारा एयरले सिमकोटमा सौलियतमा रु नौ हजार एक सयमा यात्रुबाट भाडा लिने पनि विचमा दलाली लागेर १४ हजार समेत लिने गरेको जनगुनासो आएको छ ।