निःशुल्क स्वास्थ्य शिविरमा एक हजार तीन सय ३५ जना लाभान्वित

सिमकोट । हुम्लाको दक्षिण भेगमा रहेको चंखेली गाउँपालिकामा वैशाख दुई गतेदेखि चार गतेसम्म सञ्चालन भएको निशुल्क स्वास्थ्य शिविरमा ३२ जना विरामीको थप उपचारका लागि जिल्ला बाहिर रेफर गरिएको छ । 

   नि:शुल्क स्वास्थ्य शिविरमा स्त्री तथा प्रसुती, जनरल, डेन्टल लगायतका २३ जना महिला र ९ जना पुरुष गरी ३२ जनालाई थप उपचारका लागि जिल्ला बाहिर रेफर गरिएको चंखेली गाउँपालिका स्वास्थ्य शाखा प्रमुख सुरविर शाहीले बताउनुभयो । यसैगरी एक सय ६९ जना साठी वर्षभन्दा माथिका वृद्धवृद्धाहरुको उपचार गरिएको संयोजक शाहीले बताउनुभयो । नौ सय पचास महिला र तीन सय ८५ जना पुरुष गरी एक हजार तीन सय ३५ जना सेवाग्राही उक्त नि:शुल्क स्वास्थ्य शिविरबाट लाभान्वित भएको बताइएको छ । 
   शिविरमा जनरल ओपिडी, स्त्री तथा प्रसुती, जनरल, डेन्टल, गर्भवती महिनाको गर्भ जाँच,टिभि, महिलाको आङ्ग बस्ने, परिवार नियोजन, ल्याव प्रयोग शाला लगायतका विभिन्न रोगको विशेषज्ञ डाक्टरबाट उपचार गरिएको गाउँपालिका अध्यक्ष प्यारीलाल शाहीले बताउनुभयो । सुन्दर ढोका नेपालको आर्थिक तथा प्राविधिक सहयोगका र चंखेली गाउँपालिकाको आयोजनामा पालिका केन्द्र पिप्लाङ्ग वर्थिङ्ग सेन्टरमा उक्त सेवा प्रदान गरिएको अध्यक्ष शाहीले बताउनुभयो । 
    नि:शुल्क स्वास्थ्य शिविरमा स्वास्थ्य सेवा कार्यालय हुम्लाका एमडिजिपि डाक्टर हिमविक्रम शाही, डाक्टर ग्रेग, जोए, अस्पेन, जुड्डी, सन्तोष, नर्श जुड्डी, लगायतका चिकित्सकहरुले सेवा प्रदान गरेको बताइएको छ । यस निशुल्क स्वास्थ्य शिविरबाट ज्येष्ठ नागरिक, विपन्न, महिला र दलितलाई गाउँपालिकालाई सहयोग पुगेको छ । 
   स्वास्थ्यको पहुँचभन्दा बाहिर रहेका सर्वसाधारणलाई लक्षित गर्दै निशुल्क स्वास्थ्य शिविरको आयोजना गरिएको गाउँपालिका अध्यक्ष शाहीले बताउनुभयो । दूरदराजमा रहेका सर्वसाधारणको स्वास्थ्य उपचारलाई ध्यानमा राखी सुन्दर ढोका नेपाल संस्थाको सहयोगमा शिविर सञ्चालन भएको हो । स्वास्थ्य सेवाका लागि विभिन्न टाढा टाढा वडामा रहेका स्थानीय घण्टौं हिँडेर शिविर स्थल आइपुगेर सेवा लिएका थिए ।