हुम्लामा आजबाट भिटामिन ए र जुकाको औषधि दश हजार बालबालिकामा खुवाउन सुरु

सिमकोट । नेपाल सरकारको भिटामिन ए र जुका औषधि खुवाउने कार्यक्रम अन्तर्गत हुम्लाका सातवटै स्थानीय तहमा आज आइतबारदेखि सुरु भएको छ । आज र भोली दुई दिन राष्ट्रिय भिटामिन ए कार्यक्रम अन्तर्गत ६ देखि ५९ महिना उमेर समुहका बालबालिकाहरुलाई भिटामिन ‘ए’ र १ देखि ५ वर्ष उमेर समूहका बालबालिकाहरुलाई जुकाको औषधि खुवाउन सुरु गरिएको जानकारी प्राप्त भएको छ । 
हुम्लामा रहेका करिब दश हजार बढी बालबालिकालाई भिटामिन ए र जुकाको औषधि खुवाइने भएको छ । जिल्लामा रहेका पाँच हजार नौ सय आठ बालबालिकालाई भिटामिन ए खुवाइने भएको छ । भने चार हजार पाँच सय १२ बालबालिकालाई जुकाको औषधि खुवाउन सुरु गरिएको स्वास्थ्य सेवा कार्यालय हुम्लाका प्रमुख डाक्टर प्रतिक्षा भारतीले बताउनुभयो । जिल्लाका करिब दश हजार चार सय बिस जना बालबालिकालाई भिटामिन ए र जुकाको औषधि खुवाउन आजबाट सुरु भएको छ । 
हुम्लाको सिमकोट, नाम्खा, खार्पुनाथ, अदानचुली, चंखेली, सर्केगाड र ताँजकोट सातवटै स्थानीय तहमा आज पाँच वर्ष मुनिका बालबालिकालाई भिटामिन ए र जुकाको औषधि खुवाउन सुरु भएको स्वास्थ्य सेवा कार्यालय हुम्लाले जनाएको छ । 
सरकारले भिटामिन ‘ए’ कमीको रोकथाम तथा उपचारका लागि ०५० सालमा ८ जिल्लाबाट सुरु भएको राष्ट्रिय भिटामिन ‘ए’ कार्यक्रम  २०५९ देखि देशभरि नै लागू गरिएको हो ।