खार्पुनाथले उचाल्यो १६ औं राष्ट्रपति नरिङ शिल्डको उपाधी 

सिमकोट । हुम्ला सदरमुकाम सिमकोटमा सम्पन्न सिमकोटमा जारी १६ औं राष्ट्रपति नरिङशिल्डको उपाधी खार्पुनाथ गाउँपालिकाले उचालेको छ । 

प्रतियोगितामा सञ्चालन भएका १३ विधाका खेलहरुमा ८ वटा स्वर्ण पदक बिजेता खार्पुनाथ गाउँपालिकाले यस वर्षको राष्ट्रपति नरिङशिल्ड बिजेता बनेको प्रतियोगिताका प्रमुख रेफ्री बाँचबहादुर रावतले जानकारी दिए । 

‘१६ औं राष्ट्रपति नरिङशिल्डमा सहभागि जिल्लाका सातवटै गाउँपालिका मध्ये खार्पुनाथले ८ वटा विधामा स्वर्ण पदक जितेपछि यस वर्षको नरिङशिल्डको बिजेता बनेको हो’, आयोजक सामाजिक विकास कार्यालय हुम्लाका प्रमुख इश्वर बहादुर सिंहले भने, ‘प्रतियोगितामा ७ स्वर्ण पदक बिजेता सर्केगाड उपबिजेता बनेको छ । सर्केगाड १४ र १५ औं राष्ट्रपति नरिङशिल्ड बिजेता हो ।’

खेलका क्रममा पटक–पटक विवाद हुदैं रोकिदै सञ्चालन हुदैं आएको प्रतियोगितामा सञ्चालित १३ वटा विधाका खेलको मूल्यांकनका आधारमा बिजेता घोषणा गरिएको हो । यद्यपी आफूले दर्ता गराएका कबड्डी र तीन हजार मिटर दौड प्रतियोगिता पनि खेलाउनु पर्ने, अन्य पालिकाले सहभागि नभए आफू स्वतहः बिजेता हुनपर्ने भन्दै सर्केगाडले बिरोध जनाएको थियो ।