ताँजाकोट–२ को दलितवाडामा एकीकृत बस्ती विकास गरिने

सिमकोट

जिल्ला विपद् व्यवस्थापन समितिको बैठकले ताँजाकोट गाउँपालिका वडा नम्बर २ स्थित मैला गाउँको दलितवाडा बस्तीमा एकीकृत बस्ती विकास कार्यक्रम सञ्चालन गर्ने निर्णय गरेको छ ।
कर्णाली प्रदेश सरकारको चालु आर्थिक वर्ष २०८२÷८३ को बजेटमार्फत भौतिक पूर्वाधार तथा सहरी विकास मन्त्रालय अन्तर्गत सञ्चालन हुने “एकीकृत बस्ती विकास कार्यक्रम” मा उक्त बस्ती छनोट भएपछि जिल्ला विपद् व्यवस्थापन समितिले कार्यक्रम कार्यान्वयनका लागि सम्बन्धित निकायमा सिफारिस गर्ने निर्णय गरेको हो ।

सहायक प्रमुख जिल्ला अधिकारी राजेन्द्र कुमार चन्दका अनुसार विगतका आर्थिक वर्षहरूमा अविरल वर्षाका कारण आएको बाढी तथा पहिरोबाट प्रभावित ३६ घरधुरीलाई समेटेर एकीकृत बस्ती विकास गरिनेछ । ताँजाकोट गाउँपालिकाले ती घरधुरी छनोट गरी जिल्ला विपद् व्यवस्थापन समिति हुम्लालाई अनुरोध गरेको थियो । समितिको बैठकले उक्त निर्णय अनुमोदन गर्दै कार्यान्वयनका लागि सम्बन्धित निकायमा सिफारिस गर्ने निर्णय गरेको हो ।

जिल्ला विपद् व्यवस्थापन समिति हुम्लाका संयोजक तथा प्रमुख जिल्ला अधिकारी टेककुमार रेग्मीको अध्यक्षतामा बसेको बैठकमा जिल्ला समन्वय समितिका प्रमुख शिवराज शर्मा, विभिन्न सरोकारवाला निकाय, नागरिक समाज, राजनीतिक दलका प्रतिनिधि, नाम्खा, सिमकोट, खार्पुनाथ, सर्केगाड तथा ताँजाकोट गाउँपालिकाका अध्यक्ष, नेपाल रेडक्रस सोसाइटी, जिल्लास्थित चारवटै सुरक्षा निकायका प्रमुख तथा सञ्चारकर्मीहरूको सहभागिता रहेको थियो ।