ताजाँकोटको मदनामा ६÷७ महिनादेखि टावर र फोजी सेवा अवरुद्ध, स्थानीयलाई सास्ती

सिमकोट

हुम्लाको दक्षिण क्षेत्रमा रहेको ताजाँको गाउँपालिकाको वडा नम्बर ५ को मदान गाउँमा विगत ६÷७ महिनादेखि मोबाइल टावर र फोजी इन्टरनेट सेवा नियमित रूपमा अवरुद्ध हुँदा स्थानीय बासिन्दा समस्यामा परेका छन् ।

मदाना गाउँका स्थानीयका अनुसार राति १० बजेदेखि बिहान ९ बजेसम्म टावर नआउने तथा अधिकांश मोबाइलमा फोजी इन्टरनेट सेवा नचल्ने समस्या रहँदै आएको छ । लामो समयसम्म समस्या समाधान नभएपछि सम्बन्धित निकायप्रति स्थानीयले गुनासो गरेका छन् ।

स्थानीय पदम नेपालीले सञ्चार सेवा अवरुद्ध हुँदा दैनिक कामकाज, सूचना आदानप्रदान तथा आकस्मिक अवस्थामा समेत समस्या हुने गरेको बताउनुभयो । उहाँले समस्या समाधानका लागि सम्बन्धित निकायले चासो नदेखाएको आरोप लगाउनुभयो ।

यस विषयमा वडा अध्यक्ष मदन नेपालीसँग बुझ्दा विद्युत्को पावरले धान्न नसक्दा यो समस्या उत्पन्न भएको जानकारी दिनुभयो । उहाँका अनुसार समस्याको समाधानका लागि बैशाख १७ गते नेपाल टेलिकम वायरलेस केन्द्रीय कार्यालय काठमाडौंमा निवेदनसमेत पेश गरिएको बताउनु भएको छ ।

वडा अध्यक्ष नेपालीका अनुसार सम्बन्धित कार्यालयले बजेट व्यवस्थापन गरेपछि लाइन नियमित सञ्चालन गरिने प्रतिक्रिया दिएको छ । साथै ताजाँकोटको वडा नम्बर ४ पाड्नीबाडामा रहेको कर्पुखोला लघुजलविद्युत् लाइन विस्तारको काम अबको केही समयपछि सुरु गरिने गरिसकेपछि मदना गाउँको फोजी टावरको समस्या समाधान गरिने वडा अध्यक्ष नेपालीको भनाई रहेको छ । स्थानीयले सञ्चार सेवा नियमित बनाउन सम्बन्धित निकायसँग तत्काल पहल गर्न माग गरेका छन् ।