लाली गुराँस माध्यमिक विद्यालयमा स्मार्ट बोर्डमार्फत शिक्षण सिकाई कार्य सुरु

हुम्ला । सर्केगाड गाउँपालिका–२ स्थित श्री लाली गुराँस माध्यमिक विद्यालयमा बुधबारदेखि स्मार्ट बोर्डमार्फत शिक्षण–सिकाइ कार्य सुरु गरिएको छ । बुधबारदेखि सर्केगाड गाउँपालिकाबाट प्राप्त स्मार्ट बोर्ड कक्षा ६ देखि कक्षा १० सम्मका कक्षाकोठामा जडान गरी नियमित पठनपाठन सञ्चालन गरिएको विद्यालयका प्रधानाध्यापक काली बहादुर महताराले जानकारी दिनुभयो ।

प्रधानाध्यापक महताराका अनुसार सूचना तथा सञ्चार प्रविधिमा आधारित शिक्षण प्रणाली लागू भएसँगै विद्यार्थीलाई पाठ्यवस्तु दृश्य सामग्री, भिडियो तथा डिजिटल प्रस्तुतीकरणमार्फत सहज रूपमा बुझाउन सकिने भएको छ। यसले विद्यार्थीको सिकाइ उपलब्धि बढाउनुका साथै कक्षाकोठालाई थप आकर्षक र प्रभावकारी बनाउने विश्वास विद्यालयले लिएको छ । 

स्मार्ट बोर्डको प्रयोगसँगै शिक्षकहरूले आधुनिक प्रविधिको उपयोग गरी अन्तरक्रियात्मक ढंगले पठनपाठन सञ्चालन गर्न थालेका छन्। यसबाट विद्यार्थीमा सिकाइप्रतिको रुचि वृद्धि हुने र डिजिटल शिक्षामा पहुँच विस्तार हुने अपेक्षा गरिएको छ ।सर्केगाड गाउँपालिकाले सामुदायिक विद्यालयमा प्रविधिमैत्री शिक्षा प्रवद्र्धन गर्ने उद्देश्यले स्मार्ट बोर्ड उपलब्ध गराएको हो । विद्यालयले आगामी दिनमा पनि सूचना प्रविधिको अधिकतम उपयोग गर्दै गुणस्तरीय शिक्षा प्रदान गर्ने प्रतिबद्धता जनाएको छ ।