घरको छतबाट लडेकी महिलाको हेलिकप्टरद्वारा उद्वार

हुम्ला । घरको छतबाट लडेर सक्त घाइते भएकी एक जना महिलालाई नेपाली सेनाको हेलिकप्टरबाट उद्धार गरिएको छ । उद्धार गरिनेमा खार्पुनाथ गाउँपालिका वडा नम्वर ४ स्थित नल्ला गाउँकी ३५ वर्षीया विमा शाही रहेकी छन् ।

शुक्रबार विहान आफ्नै घरको छतबाट लडेर सक्त घाइते भएकी शाहीलाई दिउसो जिल्ला अस्पताल हुम्लामा पुगाए पनि जिल्ला अस्पताल हुम्लामा उपचार हुन नसकेपछि जिल्ला अस्पताल हुम्लाले सोही दिन जिल्ला बाहिर रेफर गरेको हो ।

घरको दोस्रो तलको छतमा रहेको भर्याङमा ओर्लने क्रममा हात फुत्कीदा शाहीको दाँत झर्नुका साथै मुखमा गम्भिर चोट लागेको घाइतेका परिवारले बताए । घाइतेको जिल्ला अस्पतालमा उपचार हुन नसकेपछि आजै खार्पुनाथ गाउँपालिकाका अध्यक्ष कर्ण रावलको पहलमा अपरान्ह ५ वजे नेपाली सेनाको हेलिकप्टरबाट कर्णली प्रदेश स्थित प्रादेशिक अस्पताल काला गाउँ सुर्खेत लगिएको हो।

घाइतेको उद्धारका लागि घरपरिवारले ४ लाख ६० हजारमा हेलिकप्टर रिर्जव गरेका छन भने खार्पुनाथ गाउँपालिकाले पनि आर्थिक सहयोग गर्ने भएको गाउँपालिका अध्यक्ष रावलको भनाई रहेको छ ।