खार्पुनाथले ल्यायो आगामी आर्थिक वर्ष ०८३।०८४ का लागि ४९ करोड भन्दा बढीको वजेट

सिमकोट, हुम्ला ।

खार्पुनाथ गाउँपालिकाले आगामी आर्थिक वर्ष ०८३।०८४ का लागि ४९ करोड भन्दा बढीको वजेट ल्याएको छ । मंगलबार भएको १९ औं गाउँसभाबाट खार्पुनाथ गाउँपालिकाले उक्त बजेट पारित गरेको छ । खार्पुनाथ गाउँपालिकाले आगामी आर्थिक वर्षका लागि ४९ करोढ ९५ लाख ५७ हजार २८८ रुपियाँको बजेट तथा कार्यक्रम गाउँसभाबाट पारित गरिएको गाउँपालिकाका अध्यक्ष कर्णबहादुर रावलले बताउनु भयो ।

आजै खार्पुनाथ गाउँपालिकाले आगामी आवका लागि नीति तथा कार्यक्रम समेत सभामा पेश गरेर पारित गरेको थियो । यसमा पूँजीगततर्फ २१ करोड ९८ लाख रुपियाँको वजेट ल्याएर कुल वजेटको ४४ प्रतिशत वजेट बजेट छुट्याईएको छ भने चालुतर्फ २७ करोड ९७ लाख ५७ हजार २८८ रुपियाँको बजेट ल्याएर कुल वजेटको ५६ प्रतिशत वजेट छुट्याईएको छ ।

यसका लागि वजेटको श्रोतका रुपमा संघ, प्रदेश र आन्तरिक राजस्वलाई आधार मानिएको छ । नयाँ आएको बजेटले स्मार्ट गाउँपालिका, रैथाने बाली प्रर्बद्धन, माटोका छाना विहीन घर निर्माण जस्ता नयाँ कार्यक्रमहरु समेटेको गाउँपालिकाका प्रबक्ता एवं वडा नम्बर ५ का वडा अध्यक्ष भरतजंग शाहीले बताउनु भयो ।

वजेट भाषण गाउँपालिका उपाध्यक्ष ज्ञानबहादुर सिंहले प्रस्तुत गर्नुभएको थियो । गाउँसभामा सभाका सदस्यहरुको उपस्थिती रहेको थियो ।