पौडी खेल्न गएका खार्पुनाथका दुई बालबाबालिका कर्णालीमा बेपत्ता

सिमकोट । कर्णाली नदीमा पौडी खेल्ने क्रममा २ जना बालबालिका बेपत्ता भएका छन् ।

दिउँसो २ बजे खार्पुनाथ गाउँपालिका–१ सुनाखाडाको कर्णाली नदीमा पौडी खेल्ने क्रममा २ जना बालबालिका बेपत्ता भएको खार्पुनाथ १ का वडा अध्यक्ष जयबहादुर शाहीले जानकारी दिए । 

वडा अध्यक्ष शाहीका अनुसार लालि गाउँका रामचन्द्र रावलका अन्दाजी १४ वर्षको छोरा प्रशान्त रावल र बिर्ख शाहीकी अन्दाजी १३ वर्षकी छोरी अनु शाही बेपत्ता भएका हुन् ।

उनीहरू पौडी खेल्ने क्रममा बेपत्ता भएको जिल्ला प्रहरी कार्यालय हुम्लाका प्रमुख डीएसपी शंकर खड्काले बताए ।
 

नदीको बहाबले खोजि कार्यमा समस्या 

बिहीबार बिहान करिब ११ बजेतिर खाना खाइसकेपछि नदी किनारमा खेल्न गएका वालवालिका घर नआएपछि परिवारले खोजि कार्य गरेको थियो । 

मालिका माध्यमिक विद्यालयमा कक्षा ७ मा अध्ययनरत दुवै वालवालिका कतै नभेटिएपछि थप खोजि कार्यका लागि घरपरिवारले प्रहरीलाई खबर गरेका थिए । 

नदी किनारमा खेल्ने क्रममा दुवै बालबालिकालाई कर्णाली नदीको बहावले बगाएको वडाध्यक्ष जयबहादुर शाहीले बताए ।

घटना लगत्तै स्थानीयवासी, प्रहरीलगायत सुरक्षाकर्मीले कर्णाली नदीको किनार तथा आसपासका क्षेत्रमा खोजी अभियान थालेको यांचु प्रहरीले जनाएको छ । 

कर्णाली नदीमा पानीको बहाव तीव्र भएहेकाले खोजी कार्यमा कठिनाइ भइरहेको यांचुबाट खटेको प्रहरी टोलीलाई उदृत गर्दै जिल्ला प्रहरी कार्यालय हुम्लाले जनाएको छ ।

दुई बालबालिका एकै पटक बेपत्ता भएपछि तल्लो लाली गाउँ शोकमा डुबेको छ ।