खार्पुनाथ गाउपालिकाद्धारा बिधालयमा स्मार्टबोर्ड, ल्यापटब र प्रिन्टर बितरण

हुम्ला
हुम्लाको खार्पुनाथ गाउँपालिकाले विद्यालय शिक्षालाई प्रविधिमैत्री बनाउने उद्देश्यका साथ विभिन्न विद्यालयहरूमा स्मार्ट शिक्षासम्बन्धी सामग्री वितरण गरेको छ। गाउँपालिकाले स्मार्ट स्कुलको अवधारणालाई प्रवद्र्धन गर्दै ५ वटा स्मार्टबोर्ड, १० वटा ल्यापटप तथा ३ वटा प्रिन्टर विद्यालयहरूलाई हस्तान्तरण गरेको हो।

गाउँपालिका अध्यक्ष कर्णबहादुर रावलले डिजिटल शिक्षाको विस्तार र गुणस्तरीय सिकाइ वातावरण निर्माण गर्ने लक्ष्यका साथ सामग्री वितरण गरिएको जानकारी दिनुभयो। उहाँका अनुसार आधुनिक प्रविधिको प्रयोगबाट विद्यार्थीहरूको सिकाइ प्रक्रिया थप प्रभावकारी, सिर्जनात्मक र आकर्षक बन्ने विश्वास गरिएको छ। अध्यक्ष रावलले सूचना तथा प्रविधिमा आधारित शिक्षाले विद्यार्थीलाई समयअनुकूल ज्ञान र सीप हासिल गर्न सहयोग पुग्ने बताउँदै आगामी दिनमा पनि विद्यालयहरूको आवश्यकताअनुसार प्रविधिमैत्री पूर्वाधार विस्तार गरिने उल्लेख गर्नुभयो। वितरण गरिएका स्मार्टबोर्डले कक्षाकोठामा अन्तरक्रियात्मक रूपमा अध्यापन गर्न सहज बनाउने, ल्यापटपले शिक्षक तथा विद्यार्थीलाई अध्ययन–अध्यापन, अनुसन्धान र शैक्षिक सामग्री तयार गर्न सहयोग पु¥याउने तथा प्रिन्टरले विद्यालयको प्रशासनिक र शैक्षिक कार्यलाई थप व्यवस्थित बनाउने अपेक्षा गरिएको छ।

गाउँपालिकाले शिक्षा क्षेत्रलाई प्राथमिकतामा राख्दै पछिल्ला वर्षहरूमा विद्यालयहरूको भौतिक तथा शैक्षिक पूर्वाधार सुधारमा विभिन्न कार्यक्रम सञ्चालन गर्दै आएको छ। यसपटकको सामग्री वितरणलाई पनि सोही अभियानको निरन्तरताका रूपमा हेरिएको छ। स्थानीय शिक्षक तथा विद्यालय व्यवस्थापन समितिका प्रतिनिधिहरूले गाउँपालिकाको यस पहलले विद्यालयमा डिजिटल शिक्षाको पहुँच विस्तार हुनुका साथै शिक्षण सिकाइ प्रक्रियामा सकारात्मक परिवर्तन आउने विश्वास व्यक्त गरेका छन्। प्रविधिमा आधारित शिक्षाको विकाससँगै विद्यार्थीहरूलाई प्रतिस्पर्धी, दक्ष र आधुनिक ज्ञानयुक्त नागरिक बनाउन गाउँपालिकाले आगामी दिनमा पनि यस्ता कार्यक्रमलाई निरन्तरता दिने जनाएको छ।