रैथाने बाली उत्पादन प्रवद्र्धनका लागि खार्पुनाथ गाउँपालिकाद्वारा कृषि प्रशोधन मेसिन वितरण

हुम्ला । 
खार्पुनाथ गाउँपालिकाले आर्थिक वर्ष २०८२÷८३ को वार्षिक कार्यक्रमअन्तर्गत रैथाने बालीको उत्पादन, संरक्षण तथा बजारीकरणलाई प्रवद्र्धन गर्ने उद्देश्यले कृषक समूह तथा सहकारी संस्थाहरूलाई कृषि प्रशोधन मेसिन वितरण गरेको छ । गाउँपालिकाले स्थानीय उत्पादनलाई आधुनिक प्रविधिसँग जोड्दै कृषि यान्त्रिकीकरणलाई प्राथमिकता दिएको जनाएको छ । सोही कार्यक्रमअन्तर्गत गाउँपालिकाभित्र रहेका ३१ वटा कृषक समूह तथा सहकारीलाई १७ वटा कम्बाइन राइस मिल, ६ वटा मल्टिक्रप थ्रेसर, ५ वटा कोदो थ्रेसर र ३ वटा फ्लोर मिल हस्तान्तरण गरिएको हो ।

गाउँपालिका अध्यक्ष कर्णबहादुर रावलले रैथाने बालीको उत्पादन वृद्धि, संरक्षण र मूल्य अभिवृद्धि गर्ने उद्देश्यले प्रशोधन मेसिन वितरण गरिएको बताउनुभयो। उहाँका अनुसार गाउँपालिकामा उत्पादन हुने धान, कोदो, फापरलगायत रैथाने बाली अब स्थानीय स्तरमै छिटो, सहज र गुणस्तरीय रूपमा चुटानी, कुटानी तथा पिसानी गर्न सकिनेछ । अध्यक्ष रावलले परम्परागत श्रममुखी प्रविधिको प्रयोग क्रमशः अन्त्य हुँदै आधुनिक कृषि प्रविधिको प्रयोग बढ्ने विश्वास व्यक्त गर्नुभयो । उहाँले वितरण गरिएका मेसिनहरू छिट्टै सञ्चालनमा ल्याइने र यसबाट कृषकहरूको उत्पादन लागत घट्नुका साथै समयको बचत हुने बताउनुभयो । 

गाउँपालिकाका अनुसार कृषि उत्पादनलाई बजारसँग जोड्ने, प्रशोधनमार्फत उत्पादनको मूल्य अभिवृद्धि गर्ने तथा कृषकको आम्दानी वृद्धि गर्ने लक्ष्यसहित कार्यक्रम सञ्चालन गरिएको हो। मेसिन सञ्चालनमा आएपछि स्थानीय कृषकले बाहिर प्रशोधनका लागि धाउनुपर्ने अवस्था हट्ने र स्थानीय स्तरमै सेवा उपलब्ध हुने अपेक्षा गरिएको छ । कार्यक्रममा सहभागी कृषक तथा सहकारीका प्रतिनिधिहरूले गाउँपालिकाले उपलब्ध गराएको कृषि उपकरणले खेतीपातीलाई थप आधुनिक, सहज र उत्पादनमुखी बनाउन ठूलो सहयोग पुग्ने विश्वास व्यक्त गरेका छन् । खार्पुनाथ गाउँपालिकाले आगामी दिनमा पनि कृषि आधुनिकीकरण, यान्त्रिकीकरण तथा रैथाने बालीको संरक्षण र बजारीकरणलाई प्राथमिकतामा राख्दै कृषकमैत्री कार्यक्रम सञ्चालन गर्ने जनाएको छ ।