खार्पुनाथ ५ मा रहेको जोगराज आधारभूत विद्यालयको दुई कोठे भवन निर्माण कार्य सम्पन्न ।।

हुम्ला
हुम्लाको खार्पुनाथ गाउँपालिकाको वडा नम्बर–५ याङचुस्थित जोगराज आधारभूत विद्यालयको दुई कोठे नयाँ भवन निर्माण कार्य सम्पन्न भएको छ ।
खार्पुनाथ गाउँपालिकाको राष्ट्रपति शैक्षिक सुधार कार्यक्रम अन्तर्गत निर्माण गरिएको उक्त भवनले विद्यालयको भौतिक पूर्वाधार मजबुत बनाउनुका साथै विद्यार्थीलाई सुरक्षित, सहज र गुणस्तरीय शैक्षिक वातावरण प्रदान गर्ने अपेक्षा गरिएको वडा नम्बर ५ का वडा अध्यक्ष भरतजंङग शाहीले बताउनु भएको छ । 

स्थानीय समुदाय तथा सरोकारवालाको सहयोगमा निर्माण कार्य सफलतापूर्वक सम्पन्न भएको वडा अध्यक्ष शाहीले जानकारी दिनुभयो । उहाँका अनुसार भवन निर्माण कार्य केही दिनअघि सम्पन्न भएपनि आज भवनको अनुगमन गरिएको हो ।

१५ लाख रुपैयाँ लागतमा निर्माण गरिएको उक्त भवनबाट विद्यालयको पठनपाठन व्यवस्थापनमा थप सहजता आउने विश्वास गरिएको छ । स्थानीय अभिभावक तथा शिक्षकहरूले पनि नयाँ भवन निर्माणसँगै विद्यालयको शैक्षिक वातावरणमा सकारात्मक सुधार आउने अपेक्षा गरेको अध्यक्ष शाहीको भनाई रहेको छ ।