चंखेली गाउँपालिकामा अब आइतबार पनि विद्यालय सञ्चालन हुने

सिमकोट
हुम्लाको दक्षिण क्षेत्रमा रहेको चंखेली गाउँपालिकाले अब आइतबार पनि शैक्षिक संस्था सञ्चालन गर्ने निर्णय गरेसँगै आजबाट विद्यालय सञ्चालनमा आएका छन । गाउँपालिका अन्तर्गत सञ्चालित सम्पूर्ण सामुदायिक विद्यालय तथा शैक्षिक संस्थामा अब हप्तामा एक दिन शनिबार मात्र सार्वजनिक बिदा हुने र आइतबार नियमित पठनपाठन सञ्चालन गरिने निर्णय गरिएको चंखेली गाउँपालिकाका अध्यक्ष प्यारीलाल शाहीले जानकारी दिनुभएको छ ।

हाल हप्ताको दुई दिन शनिबार र आइतबार सार्वजनिक बिदा हुने व्यवस्था रहेको छ । तर हिमाली जिल्ला हुम्लामा जाडो मौसमका कारण पुस र माघ महिनामा विद्यालय बन्द गर्नुपर्ने बाध्यात्मक अवस्था आउने भएकाले शैक्षिक सत्र पूरा गर्न कठिनाइ हुने देखिएको गाउँपालिकाले जनाएको छ ।

विद्यार्थीहरूको शैक्षिक हितलाई ध्यानमा राख्दै आगामी दिनमा आइतबार पनि विद्यालय सञ्चालन गरी नियमित पठनपाठनलाई निरन्तरता दिने निर्णय गरिएको अध्यक्ष शाहीले बताउनुभयो ।

गाउँपालिकाको यो निर्णयपछि चंखेली गाउँपालिकाभित्र रहेका विद्यालयहरूमा अब साताको छ दिन कक्षा सञ्चालन हुने भएको छ । चंखेली गाउँपालिकामा २२ वटा सामुदायिक विद्यालय रहेका छन । शनिबार चंखेली गाउँपालिकाको कार्यपालिकाको बैठकले आईतबार पनि विद्यालय तथा शैक्षिक संस्था सञ्चालनमा ल्याउने निर्र्णय गरेको थियो ।