याङगार गाउँमा खानेपानीको समस्या, दुषित पानी खान बाध्य तीस घरधुरी

सिमकोट । हुम्लाको उत्तरी नाम्खा गाउँपालिका–४ याङगार गाउँमा यतिबेला खानेपानीको समस्या निम्तिएको छ । तीस वटा घरधुरी रहेको याङगार गाउँका बासिन्दा लामो समयदेखि खानेपानीको समस्या झेल्दै आउनु परेको गुनासो गरेका छन् । 

   सडक निर्माणका क्रममा डोजरले पानीको पाइप लाइन नै काटि दिएपछि गाउँमा खानेपानीको समस्या निम्तिएको स्थानीय छोमु लामाले बताउनुभयो । बाटो निर्माण गर्दा भौतीक संरचनामा ध्यान नदिदा लामो समयदेखि यहाँका नागरीकलाई खानेपानीको समस्या निम्तिएको लामाले गुनासो पोख्नुभयो । गाउँमा खानेपानीको समस्याका विषयमा नजिकको स्थानीय सरकार गाउँपालिकालाई मर्मतका लागि आग्रह गर्दा कुनै वास्ता नगरेको बताइएको छ । 

    डोजरले पाइप लाइन नै काटि दिएपछि अहिले गाउँ भन्दा टाढाको दुरीमा गएर खोलाको पानी बोकेर खानुपर्ने बाध्यता भएको अर्का स्थानीय नकिडोमा तामाङले बताउनुभयो । आजभोली वर्खाको समयमा खोलाको पानी धमीलो हुने भएपनि त्यहि पानी खान बाध्य भएको उहाँले बताउनुभयो ।

अहिले याङगार गाउँका तीस घरधुरीले खोलाको धमिलो पानी छानेर खाने गरेका छन् । गाउँमा पानीको समस्याका विषयमा सम्बन्धित निकायलाई जानकारी गराउँदा कसैले ध्यान नदिएको बताइएको छ । खोलाको धमिलो पानी खादा स्वास्थ्यमा समस्या हुने चिन्ता यहाँका स्थानीयको छ । तर बाध्यताले पानी खानुपर्ने अवस्था छ ।